Prezidentimizning joriy yil 4 maydagi “Mamlakatni demokratik yangilanish jarayonida fuqarolik jamiyati institutlarining rolini tubdan oshirish chora-tadbirlari to‘g‘risida”gi farmoni  fuqarolik jamiyati institutlarini rivojlantirish bo‘yicha muhim hujjat bo‘ldi.

 Farmonga muvofiq, Prezident huzurida Fuqarolik jamiyatini rivojlantirish bo‘yicha maslahat Kengashi tuzilishi va ushbu Kengash faoliyati bevosita O‘zbekiston Respublikasi Prezidenti tomonidan  muvofiqlashtirilishi davlatimiz rahbari tomonidan fuqarolik jamiyati institutlariga ko‘rsatilayotgan alohida e’tiborning yorqin namunasidir.

Shu bilan birga mazkur farmonga ko‘ra, NNTlar erkin faoliyat olib borishi uchun bir qator imkoniyatlar yaratilgan. Jumladan, NNTlarning pensioner xodimlariga pensiya ularning mazkur tashkilotlardagi faoliyati yagona ish joyi bo‘lgan taqdirda, to‘liq to‘lanishi nazarda tutilgan.

Shu vaqtga qadar me’yoriy hujjatlarimizda Qoraqalpog‘iston Respublikasi Jo‘qorg‘i Kengesi, Xalq deputatlari viloyatlar va Toshkent shahar Kengashlari huzurida nodavlat-notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondlari tashkil etish ko‘zda tutilgan bo‘lsa-da, amalda fondni tashkil etish uchun qaysi sub’ekt muaassis bo‘lishi mavhum edi. Farmon bilan Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari hududiy fondlarning muassisi etib belgilandi va hududlarda ushbu jamoat fondlarni tashkil etish jarayoniga oydinlik kiritildi.

NNTlarimizni qiynab kelayotgan yana bir katta muammo – bino masalasi edi. Farmonga ko‘ra, hududlarda “Nodavlat notijorat tashkilotlari uylari”ni tashkil etish ko‘zda tutilmoqda. Ijtimoiy ahamiyatga ega bo‘lgan sohalarda faoliyat olib borayotgan nodavlat notijorat tashkilotlari ijara to‘lovining “nol” stavkasini qo‘llagan holda mazkur binoga joylashtiriladi. Bu esa NNTlar uchun keng imkoniyatlar eshigini ochib beradi. “Fuqarolik jamiyatini rivojlantirishga qo‘shgan hissasi uchun” ko‘krak nishonini ta’sis etilishi esa uchinchi sektorda faoliyat yuritayotgan yurtdoshlarimizni qo‘llab-quvvatlashga zamin yaratadi.

 Jamila SAYFIDINOVA,

O‘zLiDeP Samarqand viloyat

Kengashi STM rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!