O‘zLiDeP Siyosiy Kengashi Ijroiya qo‘mitasi Siyosiy ta’lim markazi tomonidan partiya viloyat, tuman va shahar Kengashlari raisining birinchi o‘rinbosarlari, mahalliy Kengashlardagi partiya deputatlik guruhi rahbarlari va ijrochi kotiblari malakasini oshirish bo‘yicha tashkil etilayotgan o‘quv seminarlar davom etmoqda.

Shunday o‘quv seminarlarning navbatdagisi Farg‘ona viloyatida bo‘lib o‘tdi. Uch kun davom etgan o‘quv seminar mashg‘ulotlari Siyosiy ta’lim markazi, Fuqarolik jamiyati shakllanishini monitoring qilish mustaqil instituti viloyat hududiy bo‘limi xodimlari, Farg‘ona Davlat universiteti professor-o‘qituvchilari hamda psixologlar tomonidan interfaol usulda olib borildi.

O‘zaro ochiq muloqot va bahs-munozara  ruhida o‘tgan seminarning birinchi kunida Prezidentimiz Shavkat Mirziyoyev g‘oyasi va rahbarligida ishlab chiqilib, hayotga izchil tatbiq etilayotgan 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi chuqur o‘rganildi. Davlat va jamiyat qurilishini takomillashtirish, qonun ustuvorligini ta’minlash va sud-huquq tizimini yanada isloh qilish, iqtisodiyotni yanada rivojlantirish va liberallashtirish, ijtimoiy sohani taraqqiy ettirish, xavfsizlik, millatlararo totuvlik va diniy bag‘rikenglikni ta’minlash, chuqur o‘ylangan, o‘zaro manfaatli va amaliy ruhdagi tashqi siyosat yuritish bo‘yicha strategiyada belgilab berilgan aniq, hayotiy islohotlar hamda  ularni amalga oshirish mexanizmlarining ilmiy-nazariy asoslariga bag‘ishlangan ma’ruzalar tinglandi.  Bu borada partiya oldida turgan ustuvor vazifalar haqida fikr almashildi. 

– Mamlakatimizning kelgusi besh yillik taraqqiyot strategiyasi barcha sohalarni liberallashtirish, modernizatsiya qilish, amalga oshirilayotgan islohotlar samarasini yanada yuksaltirish, davlat va jamiyat rivojini yangi bosqichga ko‘tarish, ayniqsa, tadbirkorlik va fermerlik faoliyatini takomillashtirish, bandlik masalasini hal etishda muhim dasturilamal bo‘lmoqda, – deydi O‘zLiDeP Siyosiy Kengashi Ijroiya Qo‘mitasi Siyosiy ta’lim markazi rahbari  B.Abdullayeva. – Shu nuqtai nazardan bugun mazkur hujjatning mazmun-mohiyati va ahamiyatini partiyamiz hududiy tashkilotlari xodimlariga yanada kengroq yetkazish, unda ko‘zda tutilgan ustuvor vazifalar ijrosi to‘g‘risida eektoratimiz xabardorligi va faol ishtirokini ta’minlash markazimiz oldida turgan muhim vazifalardan biri hisoblanadi. Mazkur o‘quv seminarlar bu yo‘nalishda targ‘ibotchilarni tayyorlash, hududlarda Harakatlar strategiyasi targ‘ibotini jonli muloqotlar, samimiy suhbatlar tarzida sodda, xalqchil va hayotiy tashkil etilishini ta’minlash maqsadida o‘tkazilmoqda. 

Seminarning keyingi kunlari uchun tanlangan mavzular ham dolzarbligi bilan ishtirokchilarda katta qiziqish uyg‘otdi. Ularga O‘zLiDeP viloyat, tuman va shahar Kengashlari raisining birinchi o‘rinbosarlari – apparat rahbarlarining va Xalq deputatlari viloyat, tuman shahar Kengashlaridagi partiya deputatlik guruhi ijrochi kotiblarining vazifa va vakolatlari, partiya faoliyatiga oid xujjatlar bilan ishlash, partiya tomonidan e’lon qilingan loyihalarni amalga oshirish, Boshlang‘ich partiya tashkilotlarida hisobot saylov yig‘ilishlarini o‘tkazish, partiya targ‘ibotida xodimlarining notiqlik san’ati va nutq madaniyatini o‘stirishga oid zarur bilim va ko‘nikmalar berildi.

– O‘z bilim va malakasini yanada boyitishga intilayotgan partiyamiz faollari uchun ushbu o‘quv seminar ayni muddao bo‘ldi, – deydi  O`zLiDeP Farg‘ona shahar kengashi apparati rahbari A.Oripov. – Muhimi, partiyadoshlarimiz o‘z ish faoliyatida uchrayotgan muammolar va yo‘l qo‘yayotgan xato-kamchiliklarini ro‘y-rost aytib, ularni bartaraf etish chora-tadbirlarini belgilab oldi. 

Shuningdek, seminarda O‘zLiDeP hududiy tashkilotlari va ommaviy axborot vositalari hamkorligini mustahkamlash, partiya veb-sayti va boshqa ijtimoiy tarmoqlar bilan ishlashning samarali usullari ishtirokchilarga amaliy mashg‘ulotlar orqali tushuntirildi.

Sh.Tolipova,

 O‘zLiDeP Farg‘ona viloyat kengashi

Matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!