Buloqboshi tumanidagi “Boymahalla” MFYda yashovchi aholi bolalari ko‘pdan beri bo‘sh vaqtini unumli o‘tkazolmay xalak. To‘g‘ri, ayrim ota-onalar imkoniyatidan kelib chiqib, farzandlarini boshqa hududdagi kasb-hunarga yo‘naltirilgan to‘garaklarga jalb qilgan. Biroq qolganlarichi?...

O‘zLiDeP Buloqboshi tuman kengashi tomonidan hududda tashkil etilgan sayyor qabulda hudud aholisining mazkur muammo yuzasidan qilgan murojaati shu yerning o‘zida ijobiy hal etildi.  

Ayni chog‘da mahalla yoshlari hududdagi 14-son Bolalar musiqa va san’at maktabi direktori, xalq deputatlari Buloqboshi tuman kengashi deputati Olimjon Matg‘oziyev tashabbusi bilan ushbu muassasada tashkil etilgan turli to‘garaklarga qatnamoqda.

Sayyor qabul davomida shuningdek, hudud ahlining yangi qabriston uchun yer ajratishda amaliy yordam so‘rab qilgan murojaati ham mutasaddilar e’tiboridan chetda qolmadi. Tuman obodonlashtirish bo‘limi mas’ul xodimi mazkur masala yechimi “Obod qishloq” dasturiga kiritilganligini ma’lum qildi.

–Sayyor qabulda kam ta’minlangan oilalarga berilishi ko‘zda tutilgan uy-joylardan ajratilishida ko‘mak berishlarini so‘rab murojaat qilgan edim, – deydi “Oltin meros” ko‘chasida yashovchi Rustam Ermatov. – Zarur hujjatlarni shu joyning o‘zida ko‘rib chiqqan tuman hokimligi mutasaddisi 2 sotixdan iborat namunali uylar sohiblari ro‘yxatiga kiritishini ma’lum qilgani meni juda hursand qildi. Bugungi uchrashuvni tashkil qilgan partiya faollari va mutasaddilarga rahmat!

Xullas, sayyor qabul davomida fuqarolar tomonidan kelib tushgan murojaatlarning aksariyati shu yerning o‘zida hal etildi, yechimi vaqt talab qiladigan masalalar nazoratga olindi.

Olimjon TALIPOV,

O‘zLiDeP Andijon viloyat Kengashi

bo‘lim mudiri

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!