Xalq deputatlari Xorazm viloyat Kengashidagi O’zLiDeP deputatlik guruhi hamda Xalq deputatlari viloyat Kengashi Mahalliy budjetni shakllantirish va ijro etish, iqtisodiy islohotni amalga oshirish va tadbirkorlikni rivojlantirish masalalari bo‘yicha doimiy komissiyasining qo‘shma yig‘ilishi bo‘lib o‘tdi.

Yig‘ilishda Vazirlar Mahkamasining 2015 yil 7 oktyabrdagi “Tadbirkorlik faoliyatini amalga oshirish uchun tanlov asosida yer uchastkalari berish tartibotlarini va qurilish uchun ruxsatnomalar olish tartibini yanada takomillashtirish chora-tadbirlari to‘g‘risida”gi qarori ijrosi yuzasidan viloyat yer tuzish va ko‘chmas mulk kadastri davlat korxonasi rahbari Q.Bekchanovning hisoboti tinglandi.

Hisobotda ta’kidlanganidek, bugun viloyatda davlat ro‘yxatidan o‘tkazilgan yer uchastkalari soni jami 635 ta bo‘lib, shundan 2016 yilda 253 ta yer uchastkasi 2,81 ga, 2017 yilda 362 tasi 4,58 ga, 2018 yilda 20 ta 0,69 ga yer maydonlari viloyat yer tuzish va ko‘chmas mulk kadastri davlat korxonasining tuman (shahar)lar filiallari tomonidan davlat ro‘yxatidan o‘tkazilgan.

– Mazkur qaror ijrosi bo‘yicha Xorazm viloyatida 2017 yil davomida 201 ta loyiha amalga oshirilishi belgilangan edi, – deydi doimiy komissiyasi raisi Sh.Safarbayev. – O‘rganishlar davomida barcha tuman (shahar)lar hududida tadbirkorlarga ajratilgan yer maydonlarida amalga oshirilishi ko‘zda tutilgan loyihalarning o‘z vaqtida to‘liq va sifatli amalga oshirilmagani, loyihalar uchun ajratilgan yer maydonlari hech qanday maqsadsiz, o‘z holiga tashlab qo‘yilgani aniqlandi. Jumladan, Urganch shahrida 29 ta loyihadan birortasi ham ishga tushirilmagan. Xiva, Gurlan, Bog‘ot tumanlarida ham ishlar qoniqarsiz ahvolda.

Yig‘ilishda shuningdek, kun tartibidagi masalalar yuzasidan viloyat hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Sh.Abdullayev, Xorazm viloyat “Ko‘chmas mulk savdo xizmati” MChJ direktori B.Saidjanov, viloyat arxitektura va qurilish bosh boshqarmasi boshlig‘i Sh.Atajanovning ham hisobotlari eshitildi.

Yig‘ilishda nazorat-tahlil faoliyati davomida aniqlangan muammolar va kamchiliklar hamda ularning yechimi bo‘yicha takliflar viloyat Kengashi sessiyasi kun tartibiga kiritilishi belgilandi.

Quvonchbek HAMROYEV,

O‘zLiDeP Xorazm viloyat Kengashi

deputatlik guruhlari bilan ishlash

bo‘limi mudiri

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!