Xalq deputatlari Termiz shahar Kengashidagi O‘zLiDeP deputatlik guruhining navbatdagi yig‘ilishi bo‘lib o‘tdi. Yig‘ilishda Surxondaryo viloyat moliya boshqarmasi boshlig‘i o‘rinbosari J.Normo‘minovning hisoboti tinglandi. 

J.Normo‘minov soliqlar turini qisqartirish va soliq yukini yengillashtirish bo‘yicha amalga oshirilgan ishlar haqida to‘xtalar ekan, birinchi navbatda, yirik korxonalarni qo‘llab-quvvatlash bo‘yicha yuridik shaxslardan olinadigan foyda solig‘i 7,5 foiz, obodonlashtirish va ijtimoiy infratuzilmani rivojlantirish soliqlari 8 foizga qisqartirilganini ma’lum qildi.  Shuningdek, o‘simlik yog‘i bo‘yicha aksiz solig‘ini 50 foizga qisqartirish hisobiga fermerlar daromadini ko‘paytirish maqsadida paxta tolasi va chigit narxi oshirilganini aytdi.

– Viloyatning 2018 yilgi mahalliy budjet xarajatlari 1 trln. 879.9 milliard so‘m bo‘lib, shundan iqtisodiyot xarajatlariga qariyb 79.2 milliard so‘m ajratildi, – deydi J.Normo‘minov. – Bu o‘tgan yilga nisbatan 32 foizga oshgan. Shuningdek, viloyatning tuman, shaharlarini obodonlashtirish, xalqimiz turmush tarzini yaxshilash maqsadida mahalliy budjetdan 52.9 milliard so‘m ajratilgan.

Yig‘ilishda shuningdek, joriy yilning o‘tgan davri mobaynida jismoniy shaxslarning daromad solig‘i pasaytirilib, shaxsiy jamg‘arib boriladigan hisob raqamlariga ajratma miqdori amaldagi 1 foizdan 2 foizga oshirilgani, ta’lim va tibbiyot muassasalarining moddiy-texnik bazasini rivojlantirish  jamg‘armasiga majburiy ajratmalarning umumiy qiymati 3,5 foizdan 3,2 foizga kamaytirilgani ta’kidlandi.

  Muhammadali MAMADALIYEV,

                                                 O‘zLiDeP Surxondaryo viloyat

kengashi bo‘lim  mudiri

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!