O‘zLiDeP Andijon viloyati Kengashi ayollarning siyosiy faolligi, jamiyatdagi o‘rni va mavqeini oshirish bo‘limi tomonidan  “Sog‘lom va mustahkam oila – jamiyat boyligi va kelajak poydevori” mavzusida davra suhbati  o‘tkazildi.

Tadbirda Xalq deputatlari viloyat va tuman Kengashlardagi O‘zLiDeP  deputatlik guruhi a’zolari, tijorat banklari vakillari, jazoni ijro etish muassasalaridan ozod etilgan xotin-qizlar hamda jurnalistlar ishtirok etdi.

Tadbirda xotin - qizlar  murojaatlari yuzasidan amaliy ishlar olib borildi. Muloqot davomida Izboskan tumani Chuvama MFY, Semrux ko‘chasi 94 uyda yashovchi, jazoni ijro etish muassasasidan ozod etilgan N.Qirg‘izova joriy yil mart oyida tuman Xalq bankiga imtiyozli kredit olish uchun hujjat topshirganini aytdi. Biroq, hozirgi kunga qadar kreditdan darak yo‘q. Murojaatdan so‘ng mazkur masala O‘zLiDeP tuman Kengashi va partiya deputatlik guruhi tomonidan nazoratga olindi.

Ta’kidlash kerak, joriy yilning o‘tgan davri mobaynida viloyat hokimligi huzuridagi Jazoni ijro etish muassasalaridan ozod etilgan shaxslarni ijtimoiy muhofaza qilish markaziga 36 nafar ayol moddiy yordam olish uchun murojaat qilgan Ularga 35 million so‘m miqdorda bir martalik yordam pullari ajratilgan. Mazkur mablag‘lar jazoni ijro etish muassasalaridan ozod etilgan ayollarning kundalik ehtiyojlari, transport xarajatlari, yaroqsiz holga kelgan shaxsiy hujjatlarini qayta tiklashlari uchun beriladi.

Davra suhbati davomida JIEMdan ozod etilgan xotin-qizlarga partiyaning esdalik sovg‘alari topshirildi.  

U.ISAYEVA,

Ayollarning siyosiy faolligi, jamiyatdagi

o‘rni va mavqeini oshirish bo‘limi mudiri

O‘zLiDePning Facebook hamda Instagram'dagi rasmiy sahifasi va Telegram’dagi kanaliga a’zo bo‘lib, so‘nggi yangiliklardan xabardor bo‘ling!