O‘zLiDeP Andijon viloyati Kengashi Paxtaobod tumanida “Mamlakatda ishbilarmonlik muhitini yaxshilash-iqtisodiyotni rivojlantirish va xalq farovonligini ta’minlashning asosidir” mavzusida tadbirkorlar forumini tashkil etdi.  

Unda Oliy Majlis Qonunchilik palatasidagi partiya fraksiyasi a’zolari, tuman hokimligi, mutasaddi tashkilot va idoralar mas’ul xodimlari hamda tadbirkor va ishbilarmonlar qatnashdilar. Mutasaddilar forum davomida ishtirokchilarni qiynayotgan masalalarga yechim topishga harakat qilish bilan birga sohaga oid qator taklif va mulohazalar bilan ham tanishdilar.

– Lizing asosida qishloq xo‘jaligi texnikalarini sotib olishda ayni kungacha ovoragarchiliklarga duch kelayotgandim, – deydi Oxunbobev massividagi “Diyor” fermer xo‘jaligi rahbari Qahramonjon Hakimov. – Bu boradagi murojaatim e’tiborsiz qolmadi. Xalk banki tuman filialining kreditlash bo‘limi boshlig‘i tomonidan tijorat krediti asosida muammoyimning hal etilishidan mamnun bo‘ldim.

Omonov massivida istiqomat qiluvchi tadbirkor Xurshidbek Xolmirzayevning muzlatgich tashkil etish uchun davlat ro‘yxatidan o‘tish va yuridik shaxs bo‘lish uchun qanday talablar qo‘yilishi to‘g‘risidagi savoliga Davlat xizmatlari tuman  markazi mutasaddisi batafsil javob berdi va bu borada amaliy yordam berishini aytdi.

Shuningdek, “Yuqori” mahallasida yashovchi yakka tartibdagi tadbirkor Fotimaxon Boltaboyevaning faoliyatini kengaytirish maqsadida qo‘shimcha yer ajratilishida ko‘mak berishlarini so‘rab qilgan murojaati tuman hokimi o‘rinbosari tomonidan joyida hal etildi. Axir qo‘shimcha 10 ta ish o‘rni yaratish tashabbusi bilan chiqayotgan tadbirkorga qanot bo‘lish kerakku!

Yuqoridagi kabi murojaatlarga yechim topishga xizmat qilgan tadbirkorlar forumi qizg‘in bahs-munozaralarga boy o‘tdi.

 Dilshodbek ABDULLAYEV,

 O‘zLiDeP Andijon viloyat Kengashi

bo‘lim  mudiri

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!