Avval xabar berganimizdek, shu kunlarda “Yosh innovatsiyachi” ko‘rik-tanlovining hududiy bosqichlari bo‘lib o‘tmoqda.

Toshkent shahar bosqichida g‘oliblarni aniqlash qiyin kechdi. Bir-biridan muhim, bugungi talablar asosida tayyorlangan loyihalar barchada katta taassurot qoldirdi.

– Xorijda elektron tijorat tizimida dronlardan keng foydalaniladi, xaridni uchuvchisiz uchar qurilmalar manzilga zumda yetkazib beradi. Ularni qishloq xo‘jaligi sohasida ham samarali ishlatsa bo‘ladi, – deydi 1-o‘rin sovrindori Muhammadamin Umarov. – Aytaylik, qo‘lda emas, dronlar yordamida dalaga dori sepib, vaqtdan yutamiz. Salomatlik uchun ham foydali. Dron parrakchalarining ikkitasi soatga qarshi, ikkitasi soat yo‘nalishida aylanib, havoni kesib agrodinamika qonuniga ko‘ra o‘rama hosil qiladi va mikrokonteler orqali tepaga uchadi. AQSh va Xitoyda ishlab chiqarilgan dronlar narxi esa 1800 AQSh dollar. Agar o‘zimizda yig‘sak, ancha arzon tushadi.

–  Tibbiy robot qarovchisini yo‘qotgan yolg‘iz keksalar, nogironlarga mo‘ljallangan, – deydi “Eng yosh innovatsiyachi” nominatsiyasi g‘olibi Qo‘yyash Rasul. – Unga dorilarni solish uchun uchta idish, istalgan tilda xohlagan so‘zingizni yozib qo‘yish uchun dinamik o‘rnatilgan. Budilnikli soat orqali kerakli vaqt belgilanadi. Uyda yurayotganda to‘siqlardan aylanib o‘tadigan qilib dasturlangan. Qurilma sizdagi sensordan chiqayotgan signalga qarab harakatlanadi va egasini topadi. Robotni yanada takomillashtirmoqchiman.

Komiljon Ziyoviddinovning “Zamonaviy bog‘dorchilik tuvaklari” ham ko‘pchilikda katta qiziqish uyg‘otdi.

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!