O‘zLiDeP Jizzax viloyat Kengashi tomonidan yoshlarni mamlakatimizda huquqiy demokratik davlat va kuchli fuqarolik jamiyati barpo etish jarayoniga keng jalb etish, siyosiy jihatdan yetuk, yetarli bilim va malakaga ega bo‘lgan kadrlarni ishga qabul qilish uchun “Yangi avlod kadrlari” loyihasi doirasida tadbir tashkil etdi.

Unda partiya viloyat Kengashi xodimlari, Xalq deputatlari viloyat Kengashidagi O‘zLiDeP deputatlik guruhlari a’zolari, “Yoshlar qanoti”  faollari, oliy ta’lim muassasalarining 80 nafar bitiruvchi bosqich talabalari ishtirok etdi.

Tadbir davomida O‘zbekiston Respublikasining “Yoshlarga oid davlat siyosati to‘g‘risida”gi qonuni va Prezidentimizning 2017 yil 5 iyuldagi “Yoshlarga oid davlat siyosati samaradorligini oshirish va O‘zbekiston yoshlar ittifoqi faoliyatini qo‘llab-quvvatlash to‘g‘risida”gi farmonida belgilab berilgan vazifalar mazmun-mohiyati hamda O`zLiDePning g‘oya va maqsadlari tushuntirildi.

Shuningdek, “Yoshlar qanoti” tomonidan yoshlar o‘rtasida amalga oshirilayotgan loyihalar, tanlovlar to‘g‘risida ham ma’lumotlar berildi, “O`zLiDePda yoshlar kuni” loyihasi, “Yosh liberallar” klubi hamda uning “Kelajak deputatlari” va “Yosh tadbirkorlar muammolarini o‘rganish” guruhlari faoliyati to‘g‘risida tushunchalar berildi.

Tadbir davomida partiya Jizzax viloyat Kengashi, Jizzax davlat pedagogika instituti va Jizzax politexnika instituti bilan hamkorlik memorandumi imzolandi. Memorandumga muvofiq, O‘zLiDeP va Oliy ta’lim dargohlari o‘rtasidagi o‘zaro hamkorlik uzoq muddatli, teng huquqlilik tamoyillari asosida tashkil etilib, tomonlar bir birlarining normativ hujjatlarini tan oladilar hamda dasturiy maqsad va vazifalarini amalga oshirishda bir birlarini qo‘llab-quvvatlaydilar.

Tadbirda mazkur memorandum doirasida belgilangan maqsad va vazifalarni amalga oshirishda tomonlar 2017-2018 o‘quv yilida oliy o‘quv yurtini tamomlayotgan 50 nafar bitiruvchi yoshlar O‘zLiDePning istiqbolli kadrlar zaxirasiga olindi.

O‘zLiDeP Jizzax viloyat

Kengashi matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!