Oliy Majlis Qonunchilik palatasi deputati Zafar Qaniyazov Qorao‘zak tumanidagi o‘rganish ishlari davomida tumandagi maktablarda bo‘lib, ta’lim sifati bilan qiziqdi.  

O‘rganish ishlari yakuni bo‘yicha 23 may kuni 16-son musiqa va san’at maktabida uchrashuv o‘tkazildi. Unda tumandagi umumta’lim maktablarining direktor o‘rinbosarlari, tuman Adliya bo‘limi va tuman Soliq inspeksiyasi boshliqlari hamda tuman hokimi o‘rinbosari ishtirok etdi.

Uchrashuvda maktablarda birinchi galda hal etilishi lozim bo‘lgan ikkita asosiy muammoga e’tibor qaratildi. Birinchi muammo – bolalarning toza ichimlik suviga bo‘lgan ehtiyojini qondirish bo‘lsa, ikkinchi muammo – maktab hududlarida yo‘l harakati xavfsizligini ta’minlash, baxtsiz hodisalarning oldini olish maqsadida hududga avtotransportlarning tezligini cheklovchi “30” belgisini qo‘yish.

Birinchi muammoni bartaraf etish uchun tumandagi suv tarmoqlari va tuman moliya bo‘limiga topshiriqlar berildi. Tuman ichki ishlar bo‘limi Yo‘l harakati havfsizligi bo‘limi ikkinchi muammoning hal etilishi ustidan nazoratni oladigan bo‘ldi.

Bundan tashqari, uchrashuv davomida tumandagi Madaniyat bo‘limiga har bir maktabda yoshlar ansambllarini tashkil etish va grafik asosida tumandagi maktablarga chiqqan holda bepul konsert tomoshalarini qo‘yib berish, bu orqali xalqning, ayniksa yoshlarning san’atga bo‘lgan qiziqishini oshirish taklifi berildi.

– Oliy Majlis Qonunchilik palatasi deputati Zafar Qaniyazov o‘tkazgan bu uchrashuv juda jonli o‘tdi, – deydi 16-son musiqa va san’at maktabi direktori Alauatdin Nag‘metullayev. – Deputat tumandagi har bitta maktabga kirib, u yerdagi ahvol bilan yaqindan tanishdi.  Hattoki, biz o‘zimiz e’tibor bermay yurgan ayrim muammolarga diqqatimizni qaratdi. Maktablardagi sport maydonchalariga, sanitariya ahvoliga jiddiy e’tibor qaratishimizni aytib o‘tdilar. Deputat tomonidan tanqid qilingan shu va boshqa muammolarni bartaraf etish bo‘yicha tuman hokimligi tomonidan ham topshiriqlar berildi.

Lola QALLIXANOVA,

O‘zLiDeP Qoraqalpog‘iston Respublikasi

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!