O‘zLiDeP Siyosiy Kengashi Ijroiya qo‘mitasi Siyosiy ta’lim markazi tomonidan  Samarqand viloyat, tuman va shahar Kengashlari raisining birinchi o‘rinbosarlari, mahalliy Kengashlardagi partiya deputatlik guruhi rahbarlari va ijrochi kotiblari malakasini oshirish uchun uch kunlik o‘quv-seminar tashkil etildi.

 Seminar mashg‘ulotlari Siyosiy ta’lim markazi, Fuqarolik jamiyati shakllanishini monitoring qilish mustaqil instituti viloyat hududiy bo‘limi xodimlari hamda psixologlar tomonidan interfaol usulda olib borildi.

–  O‘zLiDeP a’zolari va BPTlar soni jihatdan viloyatimizda peshqadam, – deydi Fuqarolik jamiyati shakllanishini monitoring qilish mustaqil instituti viloyat hududiy bo‘linmasi rahbari Foteh Rahmatov. – Ayniqsa, xalq deputatlari viloyat Kengashidagi O‘zLiDeP  deputatlik guruhi faoliyatini alohida e’tirof etish joiz. Chunki joriy yilning birinchi choragida ular tomonidan 235 ta deputatlik so‘rovlari chiqarilgan va 71 nafar mansabdor shaxslarning axboroti  eshitilgan.

Seminarda shuningdek, partiya viloyat, tuman va shahar Kengashlari raisining birinchi o‘rinbosarlari – apparat rahbarlari, xalq deputatlari viloyat, tuman shahar Kengashlaridagi partiya deputatlik guruhi ijrochi kotiblarining vazifa va vakolatlari, partiya faoliyatiga oid hujjatlar bilan ishlashga oid tavsiyalar berildi.

– Seminardan ko‘zlangan maqsad xodimlarimizning siyosiy, huquqiy   faolligini oshirish edi va bunga erishdik, – deydi  O‘zLiDeP  Samarqand viloyat Kengashi Siyosiy ta’lim markazi rahbari Jamila Sayfiddinova. – Aytish joiz, bu kabi mashg‘ulotlar partiya faollarining siyosiy va iqtisodiy bilimlarini mustahkamlashga, aholi ayniqsa, elektorat bilan ishlashda liderlik qobiliyatini yanada oshirishga xizmat qiladi.

Uch kunlik seminar davomida ishtirokchilarga mamlakatimizda yangi qabul qilinayotgan qonunlar mazmun-mohiyati ham keng tanishtirildi. 

Baxtigul QARShIYEVA,

O‘zLiDeP Samarqand viloyat

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!