Xalq deputatlari Muzrabot tuman Kengashidagi O‘zLiDeP deputatlik guruhining navbatdagi yig‘ilishi bo‘lib o‘tdi.

Yig‘ilishda Prezidentimizning 2017 yil 8 avgustdagi “Hududlarning jadal ijtimoiy-iqtisodiy rivojlanishini ta’minlashga doir ustuvor chora-tadbirlar to‘g‘risida”gi Qarori ijrosi yuzasidan tuman hokimi o‘rinbosari Komiljon Salimovning hisoboti tinglandi.

Hisobotda ta’kidlanganidek, 2017 yilda tumanda 1116 ta yangi ish o‘rni yaratilgan. Joriy yil davomida belgilangan loyihalarni amalga oshirish evaziga 1746 ta yangi ish o‘rinlarini  yaratish ko‘zda  tutilgan. Xususan, sanoat sohasida 551 ta, xizmat ko‘rsatish va servis sohasida 579 ta, qishloq xo‘jaligi sohasida 616 ta ish o‘rni yaratish belgilangan.

– Ushbu loyihalarning  82 tasi bank kreditlari va 4 tasi xorijiy investitsiyalar hisobidan moliyalashtiriladi, – deydi Komiljon Salimov. – Xususan, sanoatda umumiy qiymati 3 mlrd. 100 mln. so‘mga  teng bo‘lgan  11 ta loyihaga bank kreditlari ajratilgan  bo‘lib, 58 ta  yangi ish o‘rinlari  yaratiladi. Shundan, 2 mlrd. 30 mln. so‘m tijorat banklarining kredit mablag‘lari  hisobidan  va 1 mlrd. 70 mln. so‘m korxonaning o‘z mablag‘i hisobidan amalga oshiriladi.

 Yig‘ilishda O‘zLiDeP deputatlik guruhi tomonidan tumanning mavjud resurslardan samarali foydalanish orqali eksport salohiyatini yanada kengaytirish, qishloq  xo‘jaligi, xizmatlar va servis sohasini rivojlantirish bo‘yicha amalga oshirilayotgan loyihalarning o‘z o‘rnida bajarilishiga jiddiy e’tibor qaratish lozimligi ta’kidlandi.

                                                          Shuhrat ABILOV,

O‘zLiDeP Muzrabot tuman

Kengashi apparat rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!