Sanobar Ochilova Tayloq tumani “To‘g‘ay” qishlog‘ida istiqomat qiladi. U yoz oylarida axlat chiqindilari bir haftalab uylarda to‘planib qolishidan xavotirda.

Shu sabab fuqaro ushbu muammoni O‘zLiDeP Tayloq tuman Kengashi tomonidan “O‘zbekiston” MFYda Xalq qabulxonasi mudiri, tuman hokimining o‘rinbosarlari, tuman tashkilotlari rahbarlari ishtirokida uyushtirilgan sayyor qabulda o‘rtaga tashlashga qaror qildi.

– Mahallamizga bir haftada bir marotaba mashina keladi, – dedi u. – Chiqindilar uyulib, turli hashoratlar ko‘payishi evaziga kasalliklar kelib chiqishi mumkin.

Fuqaroning mazkur murojaati mutasaddilar tomonidan joyida hal etildi. Tuman hokimi o‘rinbosari mahalladagi axlat chiqindilarni olib ketish uchun yoz oylarida haftasiga ikki marotaba mashina tashkil etish borasida “Toza hudud” DUK tashkiloti rahbariyatiga topshiriq berdi.

Shu hududda yashovchi Xayitmurod Xurramov tomonidan aholi xonadoni uchun suyultirilgan gaz balon kech kelayotganligi to‘g‘risidagi murojaat ham shu yerning o‘zida hal etildi.

Sayyor qabulda  shuningdek, aholidan  qish oylarida hududdagi 33-maktabni tabiiy gaz bilan ta’minlash muammosi, yullarni asfalt qilish, kommunal to‘lovlarni budjet tashkilotlari ishchilari oylik maoshidan majburiy tarzda ushlanishini oldini olish  bo‘yicha 10 ga yaqin murojaatlar kelib tushdi. Ushbu murojaatlar yuzasidan mutasaddi tashkilot rahbarlariga topshiriq berilib, muammolarni hal qilish vazifasi yuklatildi.

Qabul yakunida murojaatlar tahlil qilinib, amaliy yordam ko‘rsatish yuzasidan zarur chora-tadbirlar belgilab olindi.

B.QARShIYEVA,

O‘zLiDeP Samarqand viloyat

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!