Mamlakatimiz farmatsevtika bozorining investitsiyaviy jozibadorligini oshirish maqsadida joriy yilning 20 iyun kuni “Dori vositalarini davlat ro‘yxatidan o‘tkazish samaradorligini oshirish va aholini ular bilan ta’minlashni yaxshilash chora-tadbirlari to‘g‘risida”gi O‘zbekiston Respublikasi Prezidentining farmoni qabul qilindi.

Kuzatayotgan bo‘lsangiz, so‘nggi bir yarim yil mobaynida yurtimizda tibbiyot, xususan farmatsevtika tarmog‘iga jiddiy e’tibor qaratilayapti. Bu borada o‘tgan davr ichida o‘ndan ortiq normativ-huquqiy hujjatlar qabul qilindi. Bu albatta o‘zining ijobiy natijalarini berayapti. Lekin shunga qaramay bugun amaliyot ushbu soha rivojiga to‘siq bo‘layotgan tizimli muammolar borligini ko‘rsatmoqda. Xususan, dori vositalarini davlat ro‘yxatidan o‘tkazish tizimi haddan tashqari murakkabligicha qolmoqda, bu esa samarasiz dori vositalarining olib kirilishiga sabab bo‘lmoqda.

Mamlakatimiz rahbari tomonidan qabul qilingan ushbu hujjat ayni mana shu muammolarni bartaraf etilishida asos bo‘ladi.

Farmon bilan tanishar ekansiz, unda O‘zbekiston Respublikasi Sog‘liqni saqlash vazirligi hamda O‘zbekiston Respublikasi Prezidenti huzuridagi Loyiha boshqaruvi milliy agentligi kabi tegishli tashkilotlar zimmasiga vazifalar yuklangan.  Xususan, ilg‘or xalqaro amaliyotni o‘rganish asosida bir oy muddatda asosiy kasalliklarning diagnostika va davolash standartlari, klinik protokollari qayta ko‘rib chiqilishini hamda har chorakda Ijtimoiy ahamiyatga ega dori vositalari va tibbiyot buyumlarining ro‘yxati qayta ko‘rib chiqilishini ta’minlash, bu borada tanqidiy o‘rganish o‘tkazish, dori vositalarining bojxona rasmiylashtiruviga, davlat ro‘yxatidan o‘tkazilishi va realizatsiya qilinishiga talablarni takomillashtirish, bu borada zarur chora-tadbirlarni amalga oshirish belgilangan.

Umuman olganda, mazkur farmon amalda dori vositalarini davlat ro‘yxatidan o‘tkazish tizimini soddalashtirish orqali uni yanada takomillashtirish imkonini beradi.

Axmad Toshmuhamedov,

Xalq deputatlari Olmazor

tuman Kengashidagi O‘zLiDeP

deputatlik guruhi a’zosi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!