Ulug‘bek Isaboyev Paxtabod tumanidagi ko‘zga ko‘ringan tadbirkorlardan biri. U ishbilarmonlarga ko‘rsatilayotgan imkoniyatlardan oqilona foydalanish maqsadida o‘zi istiqomat qilayotgan Do‘stlik mahallasiga yaqin hududdagi bo‘sh turgan binoni “nol” qiymatida olib, maishiy xizmat ko‘rsatish yo‘nalishida foydalanishni yo‘lga qo‘ymoqchi. Ayni masala O‘zLiDeP Paxtaobod tuman Kengashi tomonidan tashkillashtirilgan sayyor qabulda o‘z yechimini topdi.

– Bugun nafaqat bo‘sh turgan bino masalasida qilgan murojaatim hal bo‘ldi, balki mutasaddilar imtiyozli kredit olishimga ham ko‘maklashishga va’da berdilar, – deydi tadbirkor. – Taqdim etgan loyiham asosida yangi ish o‘rinlari yaratib, yoshlar bandligini ta’minlash niyatidaman.

Muazzinboy mahallasida yashovchi Chinoraxon Meliqo‘ziyeva ham sayyor qabulga kelib muammosiga yechim topdi. U anchadan buyon 2 nafar farzandi uchun nafaqa pulini ololmayotgandi. Mahalla mas’ullar bilan bir necha bor bu borada kelishmovchilikkka ham borgan. Fuqaroning murojaati partiya Paxtaobod tuman Kengashi raisi, Xalq deputatlari Paxtaobod tuman Kengashi deputati Feruza Mirzarahimova tomonidan nazoratga olinib, joyida mahalla mutasaddilari bilan hal etildi.

Sayyor qabul davomida tumandagi Bobur, Qo‘qonqishloq, Yuqori, Nodirabegim, Ko‘kto‘nlik, Tinchlik, Qorashah, Shomat mahallalalari aholisi vakillarining ham qator muammolariga yechim topildi.

Olimjon TALIPOV,

O‘zLiDeP Andijon viloyat

Kengashi xodimi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!