O‘zLiDeP Uzun tuman Kengashi tomonidan “Shodlik” madaniyat va istirohat  bog‘ida sayyor qabul tashkil etildi.

Unda partiya tuman Kengashi xodimlari, Xalq deputatlari tuman Kengashidagi partiya deputatlik guruhi a’zolari hamda mutasaddi tashkilot vakillari ishtirok etdi.

Qabul davomida “Xursand” mahallasida yashovchi Tojixol Aliqulova tikuvchilik sexini kengaytirish uchun 7 mln, “Boxoriston” mahallasida  yashovchi Surayyo Nurova esa issiqxona qurish uchun 10 mln so‘m imtiyozli kredit olishda amaliy yordam so‘rab murojaat qildilar.

Har ikki murojaatni ham xalq noibi Q.Shukurov o‘z zimmasiga olib, “Agrobank” Uzun tuman filialiga deputatlik so‘rovi yuborish orqali muammoni hal etib berishini ma’lum qildi.  

“Dehqon”  mahallasida yashovchi Ozoda Ro‘ziyeva 2016 yilda tumandagi maishiy-xizmat kasb-hunar kollejini tamomlagan. Lekin hozirga qadar o‘z mutaxassisli bo‘yicha ish topolganicha yo‘q. Sayyor qabulda so‘z olgan Ozoda o‘z mutaxassisligi bo‘yicha ish topishda amaliy yordam so‘rab murojaat qildi.

Uning murojaati tuman bandlikka ko‘maklashish markazi tomonidan atroflicha o‘rganib chiqilib, joyida hal etildi.

–Ko‘pdan beri ishsiz edim, – deydi O.Ro‘ziyeva. –  To‘g‘ri, bu masalada tegishli tashkilotlarga murojaat qildim, ammo natijadan darak bo‘lmadi. Shu bois, partiya tomonidan hududimizda tashkil etilgan sayyor qabulda mutasaddilardan ko‘mak so‘radim. Tashkilotchilarning tashabbusi bilan tuman markazidagi “Chehra” tikuvchilik korxonasiga ishga joylashdim.

Sayyor qabulda ko‘tarilgan barcha masalalar yuzasidan Xalq deputatlari Uzun tuman Kengashi deputatlari tomonidan tegishli tashkilotlarga deputatlik so‘rovlari chiqarilib, natijasi nazoratga oladigan bo‘ldi.

Shuhrat Rahmonov,

O‘zLiDeP Uzun tuman Kengashi

apparat rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!