O‘zLiDeP Buxoro viloyat Kengashi siyosiy ta’lim markazi partiya tuman Kengashi apparat rahbarlari, Xalq deputatlari tuman Kengashidagi partiya deputatlik guruhi a’zolari hamda BPT raislarining malakasini oshirishga qaratilgan o‘quv-seminar tashkil etdi.

Seminarda ishtirokchilarga “Siyosiy partiyalar to‘g‘risida”, “Xalq deputatlari viloyat, tuman va shahar Kengashi deputatining maqomi to‘g‘risida”gi va “Mahalliy davlat hokimiyati to‘g‘risida”gi qonunlar mazmun-mohiyati haqida kengroq tushunchalar berildi.

Shundan so‘ng, ishtirokchilar guruhlarga bo‘lingan holda partiya tizimida ayollar va yoshlar bilan ishlash, deputatlar tashabbuskorligini oshirish, boshlang‘ich tashkilotlar ishini kuchaytirishga qaratilgan ish va rejalarni belgilash kabi masalalar yuzasidan aniq takliflarni o‘rtaga tashlab, o‘zaro fikr almashdilar.

– Siyosiy partiya xodimi eng avvalo, o‘z tashkilotining Ustavi, Harakat dasturi, maqsad va vazifalarini teran anglashi kerak, – deydi O‘zLiDeP Buxoro tuman Kengashi raisi U.Shomurodov. – Shundagina u elektoratimiz vakillarini o‘ylantirib kelayotgan muammolarni hal etadi, odamlarni rozi qiladi. Shu bois, seminar davomida o‘zimizni qiziqtirgan savollarga malakali mutaxassislar tomonidan atroflicha javob olishga harakat qildik. Eng muhimi, nafaqat siyosiy bilimlarga, balki huquqiy va iqtisodiy bilimlarga ham ega bo‘ldik.

Seminarda shuningdek, ishtirokchilar partiya faoliyatiga oid hujjatlar bilan ishlash, partiya tomonidan e’lon qilingan loyihalarni amalga oshirish, partiya xodimlarining notiqlik san’ati va nutq madaniyatini o‘stirishga oid zarur bilim va ko‘nikmalarga ham ega bo‘lishdi.

Shamshod JAFAROV,

O‘zLiDeP Buxoro viloyat Kengashi

matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!