O‘zLiDeP faollari tomonidan tuzilgan ishchi guruh Pop tumani “G‘urumsaroy” va “Kenagas” MFY aholisi bilan yuzma-yuz muloqot tashkil etdi.

 Mazkur mahalla 2018 yil “Obod qishloq” dasturiga kiritilgan bo‘lib, ulardagi 1511 xonadonlarda 6247 nafar aholi yashaydi. Aholining ko‘p qismi novvoychilik, dehqonchilik va chorvachilik bilan shug‘ullanadi.

Kun davomida 80 ga yaqin aholi vakillari bilan suhbatlashilganda 75 dan ortiq taklif va murojaatlar kelib tushdi. Jumladan, ichimlik suvi va tabiiy gaz ta’minotini yaxshilash, noreal qarzdorlik va bandlik, uy-joy masalasidir.

- Mahallamizda sportga qiziqishi bor yoshlar juda ko‘p, - deydi mahalla faoli Jo‘raboy Do‘stqo‘ziyev. - G‘urumsaroy iqtisodiyot kasb-hunar kolleji hisobidagi bo‘sh turgan sport kompleksini ta’mirlab, yoshlarning vaqtlarini mazmunli o‘tishiga ko‘maklashilsa yaxshi bo‘lardi.

Kelib tushgan murojaat va takliflar Xalq deputatlar tuman Kengashidagi O‘zLiDeP deputatlik guruhi tomonidan nazoratga olindi.

Bundan tashqari, mahalla  ahli o‘rtasida olib borilgan muloqot davomida “Har bir oila tadbirkor” va “Yoshlar kelajagimiz” davlat Dasturi mazmun-mohiyati keng tushuntirildi. Targ‘ibot mobaynida  tomorqasida issiqxona tashkil etish istagini bildirgan aholi vakillariga zaruriy maslahat va ko‘nikmalar berildi.

Yulduz YULDASHEVA,

O‘zLiDeP Namangan viloyat

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!