Avval xabar berganimizdek, O‘zLiDeP Siyosiy Kengashi Ijroiya qo‘mitasi, Namangan viloyat kengashi xodimlari, mahalliy kengash deputatlari va partiya faollari eng chekka qishloq va mahalla aholisi bilan yuzma-yuz muloqotda bo‘lyapti.

Partiya vakillaridan iborat tuzilgan ishchi guruh a’zolari Yangiqo‘rg‘on tumanidagi “Qizilyozi” MFY aholi xonadonlari bilan muloqot qilishdi.

Qizilyozi mahallasida 383 ta xonadon mavjud bo‘lib, 2100 aholi istiqomat qiladi. Aholining aksariyat qismi bog‘dorchilik bilan shug‘ullanishi, mehnatkash bo‘lgani uchun xonadonlarda ishsizlar soni ortgan.

Uchrashuv davomida aholidan eskirgan elektr simyog‘ochlarni almashtirish, ichki ko‘chalarni asfalt qilish, qishloq oilaviy poliklinikasi, dorixona, hammom, bolalar uchun sport maydonchasi qurib berish borasida murojaatlar kelib tushdi.

Ushbu ko‘tarilgan muammolarni bartaraf etish maqsadida partiya deputatlik guruhi a’zolariga tegishli tashkilotlarga deputatlik so‘rovi jo‘natish borasida vazifalar belgilab berildi.

Aholi bilan bevosita muloqotimiz davomida ushbu mahallada ovqatlanish shaxobchasi yo‘qligi borasida ham murojaat qilindi.

Ishchi guruhimiz a’zolari ushbu mahallada istiqomat qilayotgan xususiy tadbirkor G‘ofurjon Kamalov bilan suhbatlashganida eski ovqatlanish binosini qayta ta’mirlash uchun tijorat bankdan kredit olishda muammoga duch kelganini bildirdi.

 O‘rganishlar davomida shunga amin bo‘ldikki, joriy yilning may oyida xususiy tadbirkor N.Kamalova dasturga tushgan “Olmazor” oshxonasi binosini rekonstruksiya qilish uchun ATB “Agrobank” Yangiqo‘rg‘on tumani filialiga murojaat qilgan bo‘lsada, hozirgi kunga qadar bank tomonidan resurs yo‘qligini vaj qilib kredit ajratib bermagan.

Xulosa o‘rnida shuni alohida ta’kidlab o‘tmoqchimizki, mahalla aholisi va qo‘shni qishloqdan qatnovchi fuqarolarga zamonaviy ko‘rinishdagi ovqatlanish binosini qurish, yoshlarni ish bilan ta’minlash uchun shunchalik jon kuydirib harakat qilayotgan tadbirkorga mablag‘ ajratib berishda tijorat bank vakillari o‘ta mas’uliyatsizlarcha yondashayapti deb baholash mumkin.

Ushbu muammoni o‘z vaqtida bartaraf etish maqsadida partiyamiz deputatlik guruhi vakillari o‘z nazoratiga oldi. 

Eldor Adilov,

O‘zLiDeP Yangiqo‘rg‘on

tuman Kengashi ijrochi kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!