O‘zLiDeP faollaridan iborat ishchi guruh vakillari Uchqo‘rg‘on tumanidagi “Guliston” va “Qo‘g‘ay”MFY aholisi bilan bevosita muloqot olib borishdi.

Aytish joizki, mazkur mahalla Prezidentimiz tashabbusi bilan joylarda amalga oshirilayotgan “Obod mahalla” dasturiga kiritilgan bo‘lib, u yerda aholi xonadonlarining uylari ta’mirlandi, yo‘llarga asfalt yotqizildi, toza ichimlik suvi yetkazib berish ishlari yakuniga yetkazilmoqda.

Partiya faollari har ikkala MFYlardagi 83ta xonadonlarga bevosita kirib borishdi. Uchrashuvlar jarayonida partiya faollari birinchi navbatda aholini tobora yaqinlashayotgan eng ulug‘ eng aziz bayram – O‘zbekiston Respublikasi Mustaqilligining 27 yilligi va muborak Qurbon hayiti bayrami bilan tabrikladi. Shuningdek, mamlakatimizda amalga oshirilayotgan “Obod qishloq” va “Obod mahalla” dasturlari doirasida olib borilayotgan amaliy ishlar, “Yoshlar kelajagimiz” hamda “Har bir oila-tadbirkor” dasturi doirasida tadbirkorlik bilan shug‘ullanmoqchi bo‘lgan yoshlarga va har bir oilaga imtiyozli kreditlar ajratilishi, ushbu dasturlarning hayotiy jihatlari oddiy, sodda tilda tushuntirib berildi.

Mazkur hududda jami aholi soni 2701 nafarni, xonadonlar soni 496 tani tashkil etadi. Axolining asosiy daromad manbai dexqonchilik va chorvachilikdan iborat. Mahalla hududidagi 50 ta xonadonlar o‘rganilganda 9 nafar aholi xonadonida issiqxona qurish uchun, 5 nafari parranda,
5 nafari esa kasanachilik bilan shug‘ullanish maqsadi borligi va imtiyozli kredit olishda amaliy yordam so‘rab murojaat etdilar.

Ushbu murojaatlarni ijobiy hal etib berish maqsadida aholiga O‘zLiDeP ko‘magida O‘zbekiston fermer, dehqon xo‘jaliklari va tomorqa yer egalari kengashi qoshida tashkil etilgan Jamg‘arma hisobidan 7 foizlik imtiyozli kredit ajratib beriladigan bo‘ldi.

Yulduz YULDASHEVA,

O‘zLiDeP Namangan viloyat

Kengashi matbuot kotibi