O‘zLiDeP Siyosiy Kengash Ijroiya qo‘mitasi ishchi guruhi tadbirkor, fermer hamda tomorqa yer egalari muammolarini ham o‘rgandi.

– Yaxshi niyat bilan piyoz ekkandim, – deydi Sho‘rchi tumani “Bobur” mahallasida yashovchi Xolboy Qurbonov kuyunchaklik bilan. – Kutilgandan-da ziyoda, 60 tonna hosil oldik. Har yili o‘zimiz xaridor izlab, mahsulotlarimizni sotardik. Bu yil esa “O‘zagroeksport” tomonidan mahsulotlarimizning sotib olinishini eshitib xursand bo‘lgan edik. Boshqa xaridor ham izlamadik. Ammo ular 60 tonna u yoqda tursin, 60 kilogram ham piyoz sotib olishmadi.

Fermer  yetishtirgan  hosilini “O‘zagroeksport”ga topshirish uchun qatnayverib, tuflisining  tovoni  teshildi. Birida “navbatingiz  kelsa, olamiz”, deyishdi. Ikkinchisida “eksport tugadi” deya  qisqa  va  lo‘nda gapni aytishdi, qo‘yishdi.

Sho‘rchi tumani “Shaldiroq” mahallasida yashovchi Alimardon Boltayev ham 1 gektar  maydonga  piyoz  ekib, 25 tonna hosil oldi. “O‘zagroeksport” xodimlari kelib, 1 kilogram piyozni 800 so‘mdan baholashdi va olishga va’da berishadi. Biroq...

– Ular bor-yo‘g‘i yetti tonna piyoz olishdi, xolos, – deydi tadbirkor. Keyin “Boshqa piyoz ololmaymiz, vagon yo‘q” deya jo‘nab qolishdi. Piyoz tez aynuvchi mahsulot bo‘lsa-da, masalaning oxiri bilan ularning bir pullik ham ishi bo‘lmadi. 35 million xarajat qilgandik. Mas’ullarning mas’uliyatsizligi tufayli qilgan xarajatimizni ham qoplay olmadik.

Dehqonlar bilan suhbat davomida piyozlarning ancha vaqt turib chirib ketayotgani, aynib har xil yomon xid chiqirayotganligi sababli aholi tomonidan ko‘plab e’tirozlar bildirishayotgani, eng achinarlisi piyozlarni chorva mollariga yedirishayotganini kuyunchaklik bilan gapirib o‘tishdi.

O‘zLiDeP Surxondaryo viloyat

Kengashi matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!