Xabaringiz bor, O‘zLiDeP Siyosiy Kengashi Ijroiya qo‘mitasi va partiyaning barcha hududiy Kengashlaridan tarkib topgan ishchi guruh tomonidan Prezidentimiz tashabbusi bilan amalga oshirib kelinayotgan “Obod qishloq” va “Obod mahalla” Dasturlarining joylardagi ijrosini o‘rganish, uyma-uy yurib aholi muammollariga yechim topish maqsadida yuzma-yuz muloqotlar tashkil etilmoqda.

Qariyb bir oy davomida partiya faollarining aholi bilan muloqotlari barcha hududlarda tashkil etilib, aniqlangan muammolar bo‘yicha tegishli tashkilotlarga deputatlik so‘rovi jo‘natildi, har bir muammoni ijobiy hal etish borasida sa’y-harakatlar boshlab yuborilgan.

O‘zLiDeP Siyosiy Kengashi Ijroiya qo‘mitasi raisi Aktam Xaitov hududlarda olib borilgan ushbu o‘rganishlarning natijalari bo‘yicha yig‘ilish o‘tkazdi. Unda partiya xodimlarning har biriga ushbu o‘rganilgan muammolarni o‘z vaqtida bartaraf etish, partiya deputatlik guruhlari tomonidan jo‘natilgan deputatlik so‘rovlarning natijalari bo‘yicha kunlik nazoratini olib borish, partiya safida a’zolar sonini keskin oshirish, tadbirkorlar va fermerlar bilan doimiy muloqotda bo‘lish va aniqlangan muammolarini partiyaviy vositalar orqali yechim topish borasida ko‘rsatmalar berdi.

Yig‘ilishda shuningdek, hududlarning imkoniyatidan kelib chiqqan holda tumanlarni ijtimoiy-iqtisodiy rivojlantirish bo‘yicha dasturlarga aniq takliflar olish, tadbirkorlarning investitsiyalar bilan bog‘liq muammolarini aniqlab tegishli tashkilotlar, vazirliklarga deputatlik so‘rovlari jo‘natish lozimligi ta’kidlab o‘tildi.

Muhokama qilingan barcha masalalar bo‘yicha yig‘ilish qarori qabul qilindi.

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!