O‘zLiDeP Yangiariq tuman Kengashi tomonidan 15-sonli Musiqa va san’at maktabida “Ishbilarmon ayol” ko‘rik-tanlovining tuman bosqichi o‘tkazildi.  

Tanlovda ishtirokchilarning zamonaviy ishlab chiqarishni yo‘lga qo‘yish orqali yangi ish o‘rni yaratgani, eksportga yo‘naltirilgan yoki import o‘rnini bosadigan mahsulot ishlab chiqarayotgani, aholiga yuqori sifatli xizmat ko‘rsatayotgani kabi jihatlarga alohida e’tibor qaratildi. 

–Tadbirkor ayollarimizga rag‘bat berayotgan ushbu tanlovda g‘olib bo‘lganimdan behad hursandman, – deydi tanlov g‘olibi Iroda Sadullayeva. – Bunday tadbirlar faol va tadbirkor xotin-qizlar faoliyati, ularning ilg‘or tajriba va ish usullari bilan tanishish imkonini yaratadi. Endi menga bildirilgan ishonchni oqlash uchun bor kuch-g‘ayratimni ishga solib, yurt taraqqiyotiga o‘z hissamni qo‘shaman. 

Tanlovda ikkinchi o‘ringa eng namunali tadbirkor Hamida Matyakubova, uchinchi o‘ringa “Yangiariq poyafzal” oilaviy korxonasi rahbari Roxatoy Ollaberganova sazovor bo‘ldi. 

Tanlov yakunida g‘olib va sovrindorlar tashkilotchilar tomonidan esdalik sovg‘alari bilan taqdirlandi.

 Musharraf RAXIMOVA,

ayollar bilan ishlash

 bo‘limi mudiri