Davlatimiz rahbari aniq rejalarni alohida belgilab berdi
03.02.2020, 12:22
Xabaringiz bor, joriy yilning 24 yanvar kuni barchamiz mamlakatimiz taraqqiyotidagi muhim voqeaga guvoh bo‘ldik. Konstitutsiyamizning 93-moddasi 7-bandiga muvofiq O‘zbekiston Respublikasi Prezidenti muhtaram Shavkat Miromonovich Mirziyoyev mamlakat tarixida uchinchi marotaba Oliy Majlis palatalariga aniq ustuvor maqsadlarni qamrab olgan Murojaatnoma yo‘lladi. Murojaatnoma doirasida xalqimizning ehtiyojlari va orzu umidlari, amalga oshirilayotgan islohotlardagi keskin muammolar hamda ushbu yilda ularni hal qilishga oid aniq rejalar belgilandi.
Navbatdagi Murojaatnoma ijtimoiy-siyosiy va ijtimoiy-iqtisodiy ahamiyatga molik qator dolzarb masalalarni o‘z ichiga oladi. Biz mamlakatimizdagi yetakchi siyosiy partiya sifatida, qolaversa, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini amalga oshirish bo‘yicha to‘la javobgarlikni olgan siyosiy kuch sifatida o‘zimizning barcha imkoniyatlarimizni Yurtboshimiz tomonidan mazkur Murojaatnomada belgilab berilgan maqsadlarga erishish yo‘lida faol va samarali ishtirok etish uchun to‘la safarbar etmog‘imiz lozim.
Olimizda turgan ustuvor vazifalardan biri xalqni, davlat organlari, fuqarolik jamiyati institutlari va biznes hamjamiyatlari Murojaatnomadagi g‘oyalar atrofiga birlashtirish, jamiyat va davlat hayotidagi barcha sohalarda demokratlashtirish jarayonini davom ettirishdir. Tarixiy Murojaatnomada aytilgan va partiyamiz platformasining mazmunini ifodlaydigan “demokratik islohotlar – bizning yagona va eng ishonchli yo‘limizdir” degan so‘zlari partiyamizning muhim shioriga aylandi.
Prezidentimizning Oliy Majlis palatalariga taqdim etgan navbatdagi tarixiy Murojaatnomasining quyidagi o‘ziga xos xususiyatlari haqida qisqacha to‘xtalib o‘tsam.
Birinchidan, 2020 yil mamlakatimizda “Ilm-ma’rifat va raqamli iqtisodiyotni rivojlantirish yili” deb e’lon qilindi va shu bilan ilmiy va texnologik taraqqiyotning muhimligi, har birimizning raqamli bilimlar va axborot texnologiyalarni chuqur o‘zlashtirishimiz zarurligiga alohida urg‘u berildi. Partiyada to‘plangan tajribadan kelib chiqib shuni ayta olamizki, ijtimoiy tarmoqlar va Internetdagi ommaviy saytlarda partiya targ‘iboti imkoniyatlaridan foydalanish o‘tgan parlament saylovlarida o‘z samarasini berdi. Shu bois, O‘zLiDeP o‘z faoliyatida ushbu yo‘nalishni tubdan rivojlantirishga alohida e’tibor qaratadi. Chunki kelajagimiz aynan ana shu soha rivoji bilan bevosita bog‘liq.
Ikkinchidan, “raqamli iqitisodiyot”ni shakllantirish bo‘yicha ulkan vazifalar ma’lum qilindi. Bu ko‘plab sa’y-harakatlarni birlashtirishni talab qiladi, chunki buning uchun tegishli infratuzilma, mablag‘ va mehnat resurslari zarur. Haqiqatan ham gap uzoq muddatda “to‘rtinchi sanoat inqilobi” arafasida O‘zbekistonning raqobatbardoshligini ta’minlash haqida bormoqda. Istiqbolli, strategik qarashlarga ega bo‘lgan Yurtboshimiz O‘zbekistonni innovatsion taraqqiyotga, “raqamli iqtisodiyot” va “axboriy jamiyat”ni shakllantirish sari yo‘naltirmoqda. Biz ishonamizki, har birimizning manfaatimiz uchun raqamli texnologiyalarni joriy etish barcha sohalarni rivojlantirishga va insonlar hayotini tubdan yaxshilashga xizmat qiladi.
Bundan tashqari, raqamli texnologiyalar davlatimiz rahbari eng jiddiy muammo sifatida dard va alam bilan tilga olgan korrupsiyaga qarshi kurashda samarali vosita hisoblanadi. Korrupsiyaga qarshi kurashda aholining barcha qatlamlari, ekspertlar, mutaxassislar, olimlarni jalb qilish lozim. Bizning partiyamiz “halollik vaksinasi” ni singdirishga tayyor, biz O‘zLiDePda korrupsiyaning barcha ko‘rinishlariga nisbatan “murosasizlik (qat’iylik) muhiti”ni yaratamiz.
Biz korrupsiyaga qarshi kurashish samaradorligini oshirish bo‘yicha muhim vazifa sifatida siyosiy arboblar va davlat xizmatchilarining mablag‘lari va molk-mulklari haqidagi ma’lumotlarni ochiqlashtirish va deklaratsiya qilishning yangi tizimini joriy qilish, davlat xaridlarini amalga oshirishda manfaatlar to‘qnashuvini aniqlash va ularning oldini olish mexanizmlarini kuchaytirish maqsadida “Davlat xaridlari to‘g‘risida”gi qonunni, elektron xaridlar tizimini takomillashtirish kabi masalalarini ko‘rib chiqayapmiz. Ayni damda, biz korrupsiyaga qarshi kurash bo‘yicha yagona organni tashkil qilish g‘oyasini to‘la qo‘llab-quvvatlaymiz.
Amalga oshirilayotgan islohotlarga jiddiy to‘siq bo‘layotgan yana bir muammo – “xufyona iqtisodiyot”dir. O‘zLiDeP bu borada sog‘lom raqobatni shakllantirish va O‘zbekistonda qulay investitsiyaviy muhitni yaratish tarafdoridir.
Biz bozor relslari va mexanizmlariga o‘tish “xufyona iqtisodiyot”ga qarshi kurashishning samarali usullaridan biri deb hisoblaymiz. Masalan, fermer va dehqonlarning manfaatdorligini oshirish uchun qishloq xo‘jaligiga bozor mexanizmlarini joriy etish muhim ahamiyatga egadir. Bu borada Prezidentimizning paxta va bug‘doy yetishtirishda davlat xaridi amaliyotini bosqichma-bosqich bekor qilish to‘g‘risidagi gaplari n ayniqsa fermerlarni ruhlantirib yubordi.
Uchinchidan, O‘zLiDeP, Oliy Majlis Qonunchilik palatasidagi partiya fraksiyasi davlatimiz rahbarining Murojaatini o‘zining qonun ijodkorligi va nazorat-tahlil faoliyatining muhim yo‘nalishi deb qaraydi.
Xususan, partiya fraksiyasi o‘zining siyosiy platformasidan hamda Yurtboshimiz Murojaatidagi vazifalardan kelib chiqib, eksportni rivojlantirish, Mahalliy kengashlarga bo‘ladigan saylovlarning uch bosqichli tizimini optimallashtirish, tadbirkorlik faoliyatini liberallashtirish uchun litsenziya berish tizimini o‘zgartirishga xizmat qiladigan qator qonunlarni yaratish kabi qonun ijodkorligi faoliyatiga darhol kirishadi.
Ta’lim, sog‘liqni saqlash va qurilish sohalarini moliyalashtirishning samaradorligi, tashkil etilayotgan Eksportni qo‘llab-quvvatlash fondi va Eksport-kredit agentligi faoliyati, Hukumatimiz tomonidan mahsulotlarni xalqaro talablarga muvofiq standartlarini ishlab chiqish va markirovkalashning qabul qilinishi kabi partiya elektorati uchun muhim masalalar parlamentning jiddiy nazorati ostida bo‘ladi.
To‘rtinchidan, O‘zLiDeP, uning butun deputatlik korpusi oldida ham o‘z saylovchilari, umuman aholi bilan olib boriladigan ish samaradorligini jiddiy ravishda oshirish vazifasi turibdi. Biz har bir deputatimizni tegishli Xalq qabulxonasi bilan doimiy ravishda va izchil asosda birga ishlashi uchun unga biriktirishni rejalashtirayapmiz. Bu bir tomondan, partiyamizga insonlarning eng muhim muammolarini hal etishda faol ishtirok etish, boshqa tomondan xalqimiz ishonchini oqlagan va uning hurmatiga sazovor bo‘lgan holda o‘zining saylovoldi va’dalarini bajarish imkonini beradi.
Beshinchidan, davlatimiz rahbarining O‘zbekiston Respublikasi Jamoatchilik palatasini tashkil etish to‘g‘risidagi tashabbusi ham O‘zLiDeP uchun alohida ahamiyatga egadir. Bizningcha ushbu palata shubhasiz jamoatchilik nazoratini kuchaytiradi. Mazkur mexanizm mamlakatimizning ijtimoiy-iqtisodiy hayotidagi muhim masalalar bo‘yicha qarorlar qabul qilishda jamoatchilik bilan maslahatlar o‘tkazish mexanizmini mustahkamlaydi. Bizning fikrimizcha, siyosiy partiyalar vakillari Jamoatchilik palatasi ishining samaradorligini oshirishga o‘z hissalarini qo‘shishlari lozim.
Umuman olganda, Murojaatnomada alohida ta’kidlanganidek, 2019 yilda “Yangi O‘zbekiston – yangi saylovlar” shiori ostida o‘tkazilgan saylovlar tufayli mamlakatimizda mutlaqo ochiq, shaffof demokratik vaziyat shakllandi. Shu bois partiyalarning siyosiy faolligini oshirish muhim vazifa hisoblanadi va shunday bo‘lib qoladi ham. Bu har bir partiya faoli, har bir deputatimizning saylovlardagi g‘alabadan keyin yanada samarali faoliyat yuritish kerakligini anglatadi. Maqsadimiz – barcha Saylovoldi va’dalarimizni sidqidildan bajarish, bu orqali xalqimiz hayot darajasini yuksaltirishga munosib hissa qo‘shishdir. Ana shu maqsadda mas’ul idoralar bilan hamkorlikda saylovoldi uchrashuvlar chog‘ida aholi tomonidan ko‘tarilgan dolzarb masalalarni hal etish bo‘yicha aniq dasturlar va “yo‘l xaritalari” ishlab chiqildi va amalga oshirilishi boshlandi.
Aktam XAITOV,
O‘zbekiston Respublikasi
Oliy Majlisi Qonunchilik
palatasidagi O‘zLiDeP
fraksiyasi rahbari
O'xshash yangiliklar
-
Deputat jarqo‘rg‘onlik tadbirkorlar muammosini o‘rgandi
30.01.2024, 10:11
-
O’qituvchilar bilan uchrashuvda ta’lim sifatiga ta’sir qiluvchi ayrim omillar sanab o‘tildi
26.01.2024, 16:53
-
Andijonda “Inson” ijtimoiy xizmatlar markazi faoliyati o‘rganildi
26.01.2024, 16:27
-
Aholiga tibbiy xizmatlar ko‘rsatish hamda ta’lim sohasidagi ishlar holati tahlil qilindi
26.01.2024, 16:19
-
Partiya ishchi guruhi: Buvayda tumanidagi tibbiyot muassasalari faoliyati o‘rganildi
26.01.2024, 11:49
Fikringizni qoldiring