Qoraqalpoq xalqi hayotining real yaxshilanishiga erishish – asosiy maqsadimiz
12.11.2020, 09:20
Joriy yilning oktabr oyida davlatimiz rahbari Qoraqalpog‘istonda tuman va tarmoqlarni rivojlantirishning asosiy ustuvor yo‘nalishlari haqida to‘xtalib, bandlikni ta’minlash, kambag‘allikni qisqartirish, investitsiya loyihalarini amalga oshirish, xizmat ko‘rsatish, qishloq xo‘jaligi, uy-joy qurilishi, ijtimoiy infratuzilma sohalari salohiyatidan foydalanish bo‘yicha aniq vazifalarni belgilab bergan edi.
Shuningdek, Prezidentimiz BMT Bosh Assambleyasining 75-sesiyasidagi o‘z nutqida Orolbo‘yi hududi ekologik fojeaning markaziga aylanganini qayd etgani ham yodimizda. Shu bois, O‘zLiDeP a’zolari davlatimiz rahbarining BMT Bosh Assambleyasining Orolbo‘yi mintaqasini ekologik innovatsiya va texnologiyalar hududi, deb e’lon qilish haqida maxsus rezolyutsiyasini qabul qilish hamda ushbu muhim hujjat tasdiqlangan sana – Xalqaro ekologik tizimlarni himoya qilish va tiklash kuni sifatida nishonlash to‘g‘risidagi tashabbusini qo‘llab-quvvatlashni muhim deb hisoblaydi.
O‘z navbatida, O‘zbekiston yuzaga kelgan vaziyatni yaxshilash bo‘yicha keng ko‘lamli ishlarni amalga oshirmoqda. Masalan, Qoraqalpog‘iston Respublikasining har bir tumanida 2 tadan faoliyat turi o‘ziga xos “o‘sish nuqta”si etib belgilandi. Xususan, yuqoridagi faoliyat turlari bilan shug‘ullanadigan tadbirkorlik sub’ektlari 3 yil muddatga yer solig‘i, mol-mulk solig‘i, kichik korxonalarning aylanmasidan olinadigan soliq, yakka tartibdagi tadbirkorlarning qat’iy miqdordagi daromad solig‘idan ozod etiladi.
Biz yurtboshimizning Toshkentda bo‘layotgan yangiliklar Nukusga ham kelishi kerak, degan fikriga alohida e’tibor qaratamiz. Aynan shu masalalar joriy yilning 10 noyabr kuni Prezidentimiz raisligida o‘tkazilgan Qoraqalpog‘iston Respublikasini ijtimoiy-iqtisodiy rivojlantirish masalalari bo‘yicha videoselektor yig‘ilishida ko‘rib chiqildi.
523 million dollarlik to‘g‘ridan-to‘g‘ri xorijiy investitsiyalarni o‘zlashtirish, qariyb 20 mingta yangi ish o‘rinlari yaratish mo‘ljallangani kelgusi ishlarning ko‘lamini ko‘rsatib turibdi. Bu borada partiyamiz qishloq va suv xo‘jaligi sohasidagi vazifalarni hal etish, xususan, paxta yetishtirish bekor qilinayotgan 12 ming gektar maydonda eksportbop sabzavot ekinlarini joylashtirish, foydalanishdan chiqqan 36 ming gektar yerni qayta o‘zlashtirish, “Qoraqalpoq-agro” erkin iqtisodiy zonasini tashkil etish ustidan deputatlik nazoratini o‘rnatish nihoyatda muhim deb hisoblaydi.
Bugungi kunda ijtimoiy-iqtisodiy rivojlanish darajasi nisbatan past bo‘lgan Taxtako‘pir, Bo‘zatov, Shumanay tumanlarini rivojlantirish bo‘yicha alohida choralar belgilangani ham diqqatga sazovordir. Endilikda bu tumanlarda ishlab chiqarish va ijtimoiy infratuzilmani yaxshilash uchun 2021-2023 yillarda 409 milliard so‘mlik 172 ta loyiha amalga oshiriladi. Partiyamiz davlatimiz rahbarining yangi korxonalar tashkil etib, aholini ish bilan ta’minlash, oilalarni kambag‘allikdan olib chiqishga ko‘maklashish muhim degan so‘zlari amalda tadbiq etiladi – degan qat’iy fikrda. Qoraqalpog‘istonda ishlarni yangicha tashkil etish va aholi hayotini yaxshilash va daromadlarini oshirish bo‘yicha yangi tizim tashkil etilishiga ishonchimiz komil.
E’tiborga molik jihati, yaqinda O‘zLiDeP fraksiyasi vakillarining Orolbo‘yi mintaqasiga uyushtirgan safari, u yerdagi aholi olib borilayotgan tub o‘zgarishlarni qo‘llab-quvvatlabgina qolmay, davlatimiz rahbari tomonidan belgilangan vazifalarga erishishda o‘z hissalarini qo‘shishga tayyor ekanliklarini ham ko‘rsatdi.
Aktam XAITOV,
Oliy Majlis Qonunchilik
palatasi Spikeri o‘rinbosari,
O'zLiDeP fraksiyasi rahbari
O'xshash yangiliklar
-
Davlat dasturidan kelib chiqadigan partiya va fraksiya oldidagi vazifalar muhokama qilindi
26.02.2024, 21:34
-
Deputat maktab kutubxonasiga 100 dan ortiq badiiy asarlar va adabiyotlar tuhfa qildi
14.02.2024, 17:25
-
Muhim va ustuvor vazifalar belgilab olindi
31.01.2024, 17:53
-
“Ayollar daftari” bilan manzilli ishlashning shaffof mexanizmi yaratiladi
30.01.2024, 12:29
-
Deputat jarqo‘rg‘onlik tadbirkorlar muammosini o‘rgandi
30.01.2024, 10:11
Fikringizni qoldiring