Shavkat Mirziyoyev: kasallarni davolashga ham, iqtisodiyotni ishlatishga ham majbur va mas’ulmiz

28.07.2020, 21:08

Shavkat Mirziyoyev: kasallarni davolashga ham, iqtisodiyotni ishlatishga ham majbur va mas’ulmiz

O‘zbekiston Respublikasi Prezidenti Shavkat Mirziyoyev raisligida 28-iyul kuni hududlarda koronavirus bilan bog‘liq murakkab vaziyatni tartibga solish bo‘yicha ko‘rilayotgan choralar muhokamasi yuzasidan videoselektor yig‘ilishi o‘tkazildi.

Butun dunyoda COVID-19 tarqalishi hamon davom etmoqda. Mamlakatimizda oxirgi besh kunda infeksiya yuqtirganlar soni 3 mingtaga ko‘payib, 21 ming 700 nafarga yetdi.

Jumladan, Toshkent viloyatida 347 ta, Qashqadaryoda 193 ta, Surxondaryoda 130 ta, Samarqandda 123 ta, Sirdaryoda 83 ta, Andijonda 79 ta yangi kasallanganlar aniqlangan. Buxoro, Farg‘ona, Samarqand, Namangan, Toshkent, Xorazm viloyatlarida va Qoraqalpog‘istonda pnevmoniya holatlari ancha ko‘paygan.

Ma’lumki, Respublika maxsus komissiyasining qaroriga muvofiq, yurtimizda karantin talablari muddati 15 avgustgacha uzaytirildi. Shu bilan birga, hozirgi vaziyat pandemiyaga qarshi kurash ishlarini yanada kuchaytirishni talab etmoqda.

Yig‘ilishda bu borada hududlarda dolzarb bo‘lib turgan masalalar ko‘rib chiqilib, qo‘shimcha vazifalar belgilandi.

Respublika maxsus komissiyasiga joylardagi epidemiologik vaziyatni barqarorlashtirish va kasallarni davolashga amaliy yordam beradigan guruhlar tuzib, har bir hududga yuborish bo‘yicha ko‘rsatma berildi.

Ushbu guruhlarga mutasaddi idoralar, ixtisoslashgan tibbiyot markazlari hamda tibbiyot oliy o‘quv yurtlari rahbar va mutaxassislari, shuningdek, nafaqadagi tajribali shifokorlar jalb etiladi. Bu hududlarda aholiga erta va aniq tashxis qo‘yish, bemorlarni kasallik darajasiga qarab to‘g‘ri va malakali davolashda muhim omil bo‘ladi.

Hokimliklarga koronavirusga ixtisoslashgan shifoxonalar tashkil etish, intensiv va reanimatsiya o‘rinlarini ko‘paytirish, ularni zarur tibbiy jihozlar va dori-darmon bilan ta’minlash vazifasi qo‘yildi. Toshkent shahridagi tajriba asosida COVID-19 va pnevmoniya bilan kasallanganlarga dastlabki malakali tibbiy yordam ko‘rsatadigan “maxsus poliklinikalar” tashkil etish zarurligi ta’kidlandi.

Davlat rahbari og‘ir kasallar ahvolini yengillashtiradigan tibbiy uskunalar ta’minoti masalasiga alohida to‘xtaldi.

Qayd etilganidek, oxirgi ikki haftada qo‘shimcha ravishda 370 ta sun’iy nafas oldirish apparati, 1 ming 41 ta portativ nafas oldirish uskunasi, 1 ming 164 ta kislorod konsentratori va boshqa zarur tibbiy jihozlar olib kelinib, hududlarga tarqatildi. Kasallar ko‘payishi mumkinligini hisobga olib, Respublika maxsus komissiyasiga joylarga yana qo‘shimcha uskunalar yetkazish bo‘yicha topshiriq berildi.

O‘zbekiston Respublikasi Prezidentining shu yil 25 iyuldagi “Koronavirus pandemiyasini yumshatish, aholining sanitariya-epidemiologik osoyishtaligi va salomatligini saqlash tizimini tubdan takomillashtirish chora-tadbirlari to‘g‘risida”gi farmoniga muvofiq Sanitariya-epidemiologik osoyishtalik va jamoat salomatligi xizmati tashkil etildi. Ushbu xizmatning bugungi kundagi eng asosiy vazifasi virus zanjirini uzish hisoblanadi. Shuningdek, sog‘liqni saqlash tizimi, hokimliklar bilan birgalikda bemorlarni sog‘aytirish va ulardan boshqalarga virus yuqishini kamaytirish ham eng muhim yo‘nalishdir.

Yig‘ilishda yosh bolalar, homilador ayollar, keksalar, nogironligi va surunkali kasalligi bo‘lgan fuqarolar salomatligi ustidan tizimli monitoring olib borish muhimligi belgilandi.

Karantin davrida biror bir ehtiyojmand oila e’tibordan chetda qolmasligi, kam ta’minlangan aholi qatlamiga moddiy yordam, oziq-ovqat va dori-darmonlarni manzilli yetkazib berish tizimi “soat”day aniq ishlashi kerakligi ta’kidlandi.   

– Hozirgi sharoitda kasallarni davolashga ham, iqtisodiyotni ishlatishga ham majbur va mas’ulmiz. Shuning uchun aholi salomatligini saqlash, ayni paytda temir intizom bilan hamma ishlarni davom ettirishimiz kerak, – dedi Shavkat Mirziyoyev.

Ҳокимлар ўз ҳудудидаги реал вазиятдан келиб чиқиб, аниқ чоралар кўриши бўйича топшириқлар берилди. Шу билан бирга, тиббий ниқоб тақиш, ижтимоий масофани сақлаш, 65 ёшдан ошганлар зарурат бўлмаса уйдан чиқмаслиги қоидаларига қатъий риоя қилишнинг аҳамияти қайд этилди. 

Видеоселектор йиғилишида ҳокимлар ва сектор раҳбарлари қатнашганидан фойдаланиб, экспорт ва инвестиция масалалари, бюджет тушумлари прогнозининг бажарилиши, ғўза парвариши ва экинларни суғориш ишларининг бориши кўриб чиқилди. Булар юзасидан мутасадди раҳбарларнинг ҳисоботи эшитилди.

  • Ko'rildi
    714
  • Chop etish
  • Do'stlar bilan ulashish
← Orqaga qaytish

Fikringizni qoldiring

+