Prezidentimiz Shavkat Mirziyoyev joylarda amalga oshirilayotgan bunyodkorlik va obodonlashtirish ishlari, ijtimoiy-iqtisodiy islohotlarning borishi, yirik loyihalar bilan yaqindan tanishish, xalq bilan muloqot qilish maqsadida 13 aprel kuni Sirdaryo viloyatida bo‘ldi.  Davlatimiz rahbarining viloyatimizga tashrifi davomida xalq bilan o‘tkazgan uchrashuvlari, yangi loyihalar taqdimotlari chog‘ida bildirgan fikrlari, hududni yanada rivojlantirish bo‘yicha bergan tavsiyalari odamlar qalbida daxldorlik tuyg‘usini kuchaytirib, ertangi kunga ishonchini yanada mustahkamladi. Chunki Yurtboshimizning Sirdaryoga tashrifi chog‘ida hech bir masala e’tibordan chetda qolmadi.

Davlatimiz rahbari 2017 yilda viloyatimizga tashrifi chog‘ida “Bek klaster” korxonasini tashkil etish loyihasi bilan tanishgan edi. Ushbu loyiha ma’qullanib, yurtboshimizning tegishli qarori qabul qilingan edi. Qisqa vaqt ichida 18 ming gektar maydonda korxona tashkil etildi. Ushbu yerda paxta, g‘alla va boshqa donli ekinlar parvarishlanmoqda. 

Yurtboshimiz bu galgi tashrifi  davomida mazkur topshiriqlar ijrosi bilan tanish maqsadida korxonamizga tashrif buyurib, issiqxona konstruksiyalari ishlab chiqarishni mahalliylashtirish, meva-sabzavotchilik bo‘yicha mutaxassis tayyorlash, klaster qoshida tashkil etiladigan ilmiy-amaliy markaz faoliyatini takomillashtirish yuzasidan ko‘rsatmalar berdi.  Shuningdek, qishloq xo‘jaligi mahsulotlarini ilmiy asosda yetishtirish va saqlash, xaridor topish zarurligini ta’kidladi. 

Prezidentimiz qishloq xo‘jaligiga ilmiy yondashmay qo‘yganimiz sababli, ayrim ekinlardan kutilgan hosil ololmayotganligimizni e’tirof etdi va bu kamchiliklarni o‘z vaqtida bartaraf etish maqsadida korxonamiz qoshida ish boshlaydigan ilmiy-amaliy markaz faoliyatini to‘liq qo‘llab-quvvatladi. Ochig‘i davlat rahbarining korxonamizga kelib, biz bilan yaqindan muloqot qilgani, faoliyatimizni rivojlantirish bo‘yicha tavsiyalar bergani, ayniqsa, bizga bildiryotgan katta ishonch zimmamizdagi mas’uliyatni ikki karra oshirdi. Endi belni mahkam bog‘lab, belgilangan vazifalar ijrosini bajarishga bor kuch iqtidorimizni sarflashimiz kerak.   

Ulug‘bek SOTIBOLDIYEV,

O‘zLiDeP Sirdaryo viloyat Kengashi raisi,

“Bek klaster” MChJ direktori

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!