Bundan salkam bir yil avval davlatimiz rahbari viloyatimizda bo‘lganlarida, Kogon tumanida maishiy chiqindilarni qayta ishlashga ixtisoslashtirilgan zamonaviy klaster barpo etish loyihasi bilan tanishib,  loyihani qisqa vaqt ichida amalga oshirish bo‘yicha topshiriq bergan edilar.  

Ana shu topshiriqni bajarish uchun dastlab “nol” qiymatda olgan binomizni qayta ta’mirlab, bir kecha-kunduzda 450 tonna chiqindini qabul qilish quvvatiga ega bo‘lgan texnologiyani olib keldik. Keyin esa rezina va yaroqsiz shinalardan muqobil yoqilg‘i, shox-shabba, xazon hamda yog‘och chiqindilaridan brikit ko‘mir, qurilish chiqindilaridan imoratbop bloklar kabi jami o‘ndan ziyod turdagi mahsulotlarni tayyorlash uchun texnologiya xarid qildik. Hozirda korxonamizda 400 nafardan ziyod ishchi-xodim mehnat qilyapti. Kelgusida ham rejalarimiz ko‘p. Xususan, korxona faoliyatini kengaytirgan holda viloyatimizning barcha tumanlaridagi chiqindilarni qayta ishlashni maqsad qilganmiz.

Prezidentimizning korxonamizga tashrif buyurib, faoliyatimizni kengaytirish bo‘yicha bergan tavsiyalari korxonamiz jamoasi kuchiga kuch, g‘ayratiga g‘ayrat qo‘shdi.  Ayniqsa, u kishining chiqindi qayta ishlansa, tayyor mahsulotlar ishlab chiqariladi, ko‘plab ish o‘rinlari yaratiladi, eng muhimi, ekologiyamiz toza bo‘ladi, keyinchalik suv va havo orqali aholi salomatligiga yetkazilishi mumkin bo‘lgan zararning oldi olinadi, degan fikrlari bizni o‘z ustimizda ko‘proq ishlab, qo‘shimcha yangi ish o‘rinlari yaratishga undamoqda. Davlatimiz rahbarining bu kabi korxonalarni tashkil etishni rivojlantirish bo‘yicha bergan ko‘rsatmalari mamlakatimizda atrof-muhit musaffoligini ta’minlash va yangi ish o‘rinlarini yaratishda muhim omildir.

 Nasriddin RAShIDOV,

Kogon tumanidagi “Aholitrans”

MChJ  raisi, O’zLiDeP faoli

***

Prezidentimiz Buxoro viloyatiga tashrifi chog‘ida viloyat markazining tarixiy qismida turizmni yanada rivojlantirishga o‘z taklif-tavsiyalarini berdilar. Yurtboshimizning turizmni rivojlantirish borasida aytgan bu fikrlari sayyohlarning betakror tarixiy yodgorliklari, milliy hunarmandchilik an’analari bilan dunyoga mashhur bo‘lgan Buxoroi sharifga bo‘lgan qiziqishini yanada oshirishi shubhasiz.

Ta’kidlash kerak, viloyatda 2018 yilda turizmni yanada rivojlantirish konsepsiyasiga muvofiq, 61 loyihani hayotga tatbiq etish ko‘zda tutilgan. Jumladan, 32 mehmonxona, 12 motel, 10 istirohat bog‘i barpo etilib, “Buxoro Palas”, “Varaxsha” va “Zarafshon” mehmonxonalari rekonstruksiya qilinadi. Bundan tashqari, turizm bo‘yicha xalqaro va milliy tashkilotlar bilan hamkorlikni kengaytirish, restoranlar qurish, sayyohlarga xizmat ko‘rsatuvchi transport vositalari xarid qilish, madaniy meros ob’ektlarini tadbirkorlarga ijaraga berish, havo sharida sayohatni tashkil qilish, G‘ijduvon, Shofirkon, Vobkent va Jondor tumanlarida qishloq turizmini yo‘lga qo‘yish rejalashtirilgan. Bu maskanlarda sayyohlar va mehmonlarga ko‘rsatiladigan xizmat sifatini yaxshilash va boshqa bir qator jihatlar bo‘yicha mahalliy vakillik organlaridagi O’zLiDeP deputatlik guruhlari deputatlik nazoratiga olinadi.

Viloyat markazida tarixiy va madaniy meros ob’ektlarini tadbirkorlarga ijaraga berish,  Buxoro bo‘ylab havo sharida sayohatlarni tashkil qilish, G‘ijduvon, Shofirkon, Vobkent va Jondor tumanlarida qishloq turizmini yo‘lga qo‘yish rejalashtirilganligi ham elektoratimiz vakillari – tadbirkorlarga keng imkoniyatlar eshigini ochishi shubhasiz. Bu boradagi ustuvor loyihalar ijrosi viloyatga xorijiy va mahalliy sayyohlar oqimini sezilarli darajada ko‘paytiradi hamda tarmoqda xizmatlar eksporti hajmini oshiradi.

Shu o‘rinda Prezidentimizning Buxoro viloyatiga o‘tgan yilgi tashrifi chog‘ida viloyat markazining sayyohlik infratuzilmasini yanada rivojlantirish maqsadida berilgan topshiriqlar bosqichma-bosqich bajarilayotganini ta’kidlash kerak. Shaharning tarixiy qismida hunarmandlar mavzesini qurish, Haqiqat va Xo‘janurobod ko‘chalarini kengaytirib, saylgohga aylantirish, Poyikalon va Mirarab madrasalarini qayta ta’mirlash bo‘yicha berilgan topshiriqlar shular jumlasidandir.

Bir so‘z bilan aytganda, Prezidentimizning viloyatimizda tashrifi davomida aytgan fikr-mulohazalari xalqimiz turmush farovonligini oshirish, el-yurt ma’murchiligiga erishish, qo‘hna va hamisha navqiron Buxoroi Sharifning obro‘-e’tiborini yanada yuksaltirishga xizmat qiladi.  

Farmon AMINOV,

O’zLiDeP Buxoro viloyat Kengashi raisi, 

                                                              Xalq deputatlari viloyat Kengashi deputati