Бугун мамлакатимизда инсон қадри давлат сиёсати даражасига кўтарилмоқда. Халқ давлат идораларига эмас, давлат идоралари халқимизга хизмат қилиши керак, деган тамойил аллақачон ҳаётимизга кириб келди. Ўзбекистон Президентлигига партиямиздан кўрсатилган номзод – Шавкат Мирзиёевнинг сайловолди дастурида ҳам бу тамойил ўз ифодасини топган.

Шавкат Мирзиёевнинг Қашқадарё вилояти бўйича ишончли вакили Темур Поёнов Ғузор туманидаги «Шўртан газ кимё мажмуаси» МЧЖ ишчи-хизматчилари билан бўлиб ўтган учрашувда Президентликка номзоднинг таржимаи ҳоли, сайловолди дастури билан таништирар экан, мамлакатимизда инсонпарварлик ва халқпарварликка эътибор юксак даражага кўтарилаётганини айтиб ўтди.

-Президентликка номзод Шавкат Мирзиёевнинг сайловолди дастурида мамлакатимизда иқтисодий юксалишлар билан бирга инсон қадр-қимматини улуғлаш бош мақсад қилиб белгиланган - деди Т. Поёнов ўз сўзида. -  Сизларни  улуғвор ғояларни илгари сураётган, юрт истиқболи ва тараққиётини юксалтиришга қатъий бел боғлаган фидойи инсон Шавкат Мирзиёев номзодини қўллаб-қувватлашга чақираман.

Худди шундай учрашув тумандаги  4-сонли Болалар мусиқа ва саъат мактабида ҳам бўлиб ўтди. Тадбирларда Олий Мажлис Қонунчилик палатаси депутатлари -  Қаҳрамон Эргашев ва Гулшана Худаяровалар иштирок этишди ва сўзга чиқишди.

O'zLiDeP Қашқадарё вилоят Кенгаши

матбуот хизмати