Самарқандлик тадбиркор ва ҳунармандлар Янги Ўзбекистон учун овоз бермоқчи

21.10.2021, 18:30

Самарқандлик тадбиркор ва ҳунармандлар Янги Ўзбекистон учун овоз бермоқчи

Ўзбекистон Либерал-демократик партиясидан Президентликка номзод Шавкат Мирзиёевнинг Самарқанд вилоятидаги Ишончли вакили Рустам Холмуродов Ўзбекистон савдо-саноат палатаси Самарқанд вилоят ҳудудий бошқармасида ҳунарманд ва тадбиркорлар билан учрашди.

Учрашувда ишончли вакил сўзга чиқиб, кейинги йилларда мамлакатимизда барча соҳалар сингари, кичик бизнес ва хусусий тадбиркорликни ҳар томонлама қўллаб-қувватлаш, уларнинг самарали фаолият кўрсатишлари учун барча шарт-шароитлар яратилганлиги боис, тадбиркорлик ҳаракатининг умумиқтисод равнақига қўшадиган ҳиссасининг кўпайишига, янги ишчи ўринларининг пайдо бўлишига, шунингдек мулкдорлар синфининг ошишига  сабаб бўлаётганлигини таъкидлади.

Жумладан, Рустам Холмуродов ишончли вакил сифатида туманларда сайловчилар билан учрашувлар жараёнида, тадбиркорлик субъектлари билан ҳам танишганлигини, туманларга, олис қишлоқларга саноатнинг кириб борганлигини, пахта, пилла, мева-сабзавотларни қайта ишловчи корхоналарнинг ташкил этилиши туфайли янги-янги иш ўринлари яратилганлигининг гувоҳи бўлганлигини мамнуният билан қайд этди.

Ишончли вакил тадбирда қўлга қиритилаётган ҳар қандай ютуқларни таълимга берилган эътибор билан боғлади.

- Таълими кучли бўлган мамлакат ривожланади, тараққий этади.  Юртнинг келажаги илм-фаннинг юксалишига боғлиқ. Мактабгача таълимдан тортиб, олий таълим тизимигача бўлган барча бўғинлар янгиланди. Яқинда Самарқанд шаҳрида очилган Президент мактабига бордим. Бу ердаги шароитларни кўриб одамнинг ҳаваси келади. Барчаси жаҳон талабларига жавоб беради. Бу мактабни тугатган болалар эртага мамлакатга шон-шараф келтиради. Миллионларга таъсир кўрсатади. Миллионларни ўз ортидан эргаштиради. Буларнинг барчаси Шавкат Мирзиёевнинг тарихий хизматларидир, - деди Р.Холмуродов

Тадбирда сўзга чиққанлар, кейинги 5 йилда амалга оширилаётган ислоҳотлар ҳақида гапирар экан, талаба, шифокор, ўқитувчи, ўқувчи ва ишчи ходимлар пахта сиёсатида бутунлай қутилганини, бир неча йиллар давомида фуқаролигини ололмай юрган 50 мингга яқин одам фуқаролик паспортига эга бўлганини, очиқлик сиёсати, сўз эркинлиги пайдо бўлганлигини, тадбиркорларга жаҳон бозорларига чиқиш учун кенг эшиклар очилганлигини эътироф этди.

Шавкат Мирзиёев олиб борган мутлоқо янгича сиёсат орқали, халқимизнинг яшаш сифати яхшиланаётганлигини таъкидлаган ҳолда, номзоднинг сайловолди дастури амалга оширилган оламшумул ислоҳотларнинг узвий давоми эканлигини қайд этишди. Учрашувда  самарқандлик тадбиркор ва ҳунармандлар фаровон ҳаёт, буюк келажак сари қўйилган қадам  “Янги Ўзбекистон” учун овоз беришини маълум қилишди.

O’zLiDeP Самарқанд вилоят Кенгаши

матбуот хизмати

  • Кўрилди
    206
  • Чоп этиш
  • Дўстлар билан улашиш
← Орқага қайтиш

Фикрингизни қолдиринг

Расмдаги мисолнинг жавобини киритинг, агар расмдаги сонлар кўринмаса "Ctrl+F5" тугмасини босинг.

+