Президентимизнинг 2021 йил 23 ноябрдаги “Мева-сабзавотчилик ва узумчиликда оилавий тадбиркорликни ривожлантириш, қишлоқ хўжалиги ишлаб чиқаришда деҳқон хўжалигининг улушини ошириш чора-тадбирлари тўғрисида”ги қарори ижроси юзасидан Оқдарё туманида депутатлик гуруҳининг эшитуви ўтказилди.

Тадбир доирасида ишчи гуруҳ аъзолари жойларга чиққан ҳолда деҳқон хўжалигини юритиш учун берилган ер участкаларидан самарали фойдаланиш ҳолатини ўрганишди.

Таъкидланганидек, Оқдарё туманида қарор ижросини таъминлаш юзасидан аукцион орқали 270 гектар ер туман захирасига олиниб, аукцион орқали 1452 нафар фуқарога берилган. 4 та секторга 4 та экспортёр корхоналар бириктирилиб, “Бир маҳалла бир маҳсулот” тамойили асосида биринчи экинга дуккакли экинлар (фасол) экилиб парвариш қилинмоқда. Биринчи экинда сув муаммоси мавжуд эмаслиги, иккинчи экинда юзага келадиган сув муаммосини барвақт олдини олиш мақсадида 8 та ташаббускорга субсидия асосида артизан қудуқлари қазилиб сув билан таъминлаш кўзда тутилган.

Ажратилган ерлар асосан ижтимоий дафтарда турувчи фуқароларга берилган бўлиб, жумладан, 115 нафар “Темир дафтар”да, 153 нафар “Аёллар дафтари”да ва 180 нафар “Ёшлар дафтари”да турувчи фуқароларга ер ажратиб берилган.

Қодир Шойимов,

O’zLiDeP Самарқанд вилоят Кенгаши

бўлим мудири