Олий Мажлис Қонунчилик палатасидаги O'zLiDeP фракциясининг навбатдаги йиғилишида депутатлар мамлакат ҳаётининг турли соҳаларида амалга оширилаётган ислоҳотларни ҳуқуқий жиҳатдан таъминлашга қаратилган бир қатор қонун лойиҳаларини муҳокама қилди.

Хусусан, “Тадбиркорлик субъектларининг қонуний манфаатларини ҳимоя қилиш тизими ҳамда шартномавий муносабатларнинг такомиллаштирилганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳасининг муҳокамаси ниҳоятда қизғин кечди.

Ушбу ҳужжатда жисмоний шахсларга қарз шартномаларини нотариал тасдиқлаш орқали чет эл валютасида ўзаро қарз бериш ва қайтариб олишга рухсат бериш тартибини жорий қилиш кўзда тутилмоқда. Чунки фуқаролар томонидан энг кўп киришадиган шартномавий-ҳуқуқий муносабатлардан бири қарз олди-бердисидир.

Аммо амалдаги қонунчиликка мувофиқ, чет эл валютасида қарз бериш ва қайтариб олиш бўйича шартнома тузишга рухсат этилмаган. Жумладан, “Валютани тартибга солиш тўғрисида”ги қонунда резидентлар ўртасидаги валюта операциялари рўйхати келтирилган бўлиб, улар қаторида қарз шартномасини тузиш масаласи мавжуд эмас.

Таклиф этилаётган лойиҳа билан бир қатор қонунларга тегишли ўзгартиш ва қўшимчалар киритилмоқда. Қонун лойиҳасининг қабул қилиниши орқали қарз бериш ва олишда шартномавий-ҳуқуқий муносабатларнинг ривожланишига туртки бериши ва бу борада яширинча келишувлар тузилишининг олди олиниши таъминланади.

Йиғилишда депутатлар томонидан берилган таклиф ва тавсиялар асосида қонун лойиҳаси қўллаб-қувватланди.

Шундан сўнг, фракция аъзолари “Давлат божи тўғрисида”ги Ўзбекистон Республикаси Қонунига ўзгартиш ва қўшимчалар киритиш ҳақида”ги қонун лойиҳасини муҳокама қилди.

Қонун лойиҳасида нотариал ҳаракатларни амалга оширганлик учун белгиланган бир қатор давлат божи миқдорларининг ставкаларини оптималлаштириш назарда тутилмоқда.

Депутатларнинг айтишича, қонун лойиҳасининг қабул қилиниши билан давлат божи ставкалари оптималлаштирилади ва давлат божини ундиришнинг ўзига хос хусусиятлари аниқлаштирилади.

Халқ вакиллари йиғилишда кўриб чиқилган барча қонун лойиҳалари бўйича ўз фикр-мулоҳазаларини билдирган ҳолда, уларни қўллаб-қувватладилар.

Якунда фракция ваколатига доир бошқа масалалар ҳам кўриб чиқилиб, тегишли қарорлар қабул қилинди.