Давлат ва жамият бошқарувида аёлларнинг ўрни ва мавқеини янада мустаҳкамлаш – ислоҳотларимизнинг муҳим йўналишларидан биридир. O'zLiDeP “Аёллар қаноти” томонидан олға сурилаётган лойиҳалар ҳам ўзининг ишчанлиги ва самарадорлиги билан яхши натижаларга эришмоқда.

Партиянинг Навоий вилояти ҳудудий партия ташкилоти Аёллар қаноти, Навбаҳор туман кенгаши, туман Оила ва хотин-қизлар бўлими билан ҳамкорликда “Бешработ” маҳалласида ташкил этилган “Ишбилармон аёл” кўрик танловининг туман босқичи кўтаринки кайфиятда ўтказилди.

Навбаҳор туманинг “Дул-дул” ва “Навбаҳор” маҳаллаларида “Аёллар дафтари”га киритилган 44 нафар, жами 60 нафар хотин-қизларни бандлигини таъминлаган бир йўла иккита “Дул-дул гўзаллари” ва “Навбаҳор-Наманган” кооперацияларига раҳбарлик қилаётган тадбиркор Дилшода Саъдуллаева кўрик-танлов ғолиби бўлди.

- Ўн йилдан буён тикувчилик билан шуғулланаман, ўз вақтида фаолиятимни кенгайтириш ҳамда замонавий тикув машиналари харид қилиш учун оиламизга хизмат қилиб турган енгил автомобилни сотганман. Буни қарангки бугунги кунда бир йилда битта автомобилга етадиган даромад қиляпман. Президентимиз хотин-қизларни қўллаб-қувватлаш ва бизларни тадбиркорлик билан шуғулланишимиз учун кенг шароит, имкониятлар яратиб бердилар. Бугунги кунда иккита ишлаб чиқариш корхонасига эга бўлдик, халқаро шартномалар имзолаб, ўз маҳсулотларимни четга экспорт қилаяпман. Бунинг учун давлатимиз раҳбарига ташаккур айтаман, - дейди Д.Саъдуллаева.

Кўрик-танлов якунида бўлимнинг “Замонавий, бунёдкор аёл – ЎзЛиДеПни танлайди” лойиҳаси доирасида туманда мавжуд 41 та маҳалла фуқаролар йиғинларида фаолият юритаётган маҳалла фаол хотин-қизларининг 36 нафарига партияга аъзолик гувоҳномалари тантанали топширилди.

Ш.Шокирова

O'zLiDeP Навоий вилоят кенгаши

Аёлларнинг сиёсий фаоллигини, жамиятдаги ўрни

ва мавқеини ошириш бўлими мудири