“Ишбилармон аёл” кўрик-танловининг Қашқадарё вилоятида ўтаётган бу йилги вилоят босқичида фермер аёллар ғолиблик учун астойдил курашадиган кўринади. Мазкур танловнинг Чироқчи туман босқичида биринчи ўринни “Ўзбекистон” ҳудудида фаолият олиб бораётган “Озод Расулович” фермер хўжалиги раҳбари Шоҳиста Келдиёрова эгаллаганлиги шундан далолалатдир. Туманнинг Тошлоқ қишлоғида яшовчи бу ишбилармон аёл бундан ўн йилча муқаддам илғор пиллачи сифатида ном қозонган эди. Давлатга пилла топшириш режаларини ортиғи билан бажариб, туман ҳокимлигининг Фахрий ёрлиғи ва қимматбаҳо совғаларини қўлга киритган.  Бундан саккиз йил муқаддам О’zLiDeP туман кенгашининг қўллаб-қувватлаши натижасида заҳирага олинган ерда фермер хўжалиги ташкил этиб, ер билан тиллашиш борасида ҳам катта тажрибага эга эканлигини амалда исбот эта олди.

- 70 гектар ерга пахта-ғалла алмашлаб экиб, яхшигина даромад қилиб келаяпмиз,- дейди Шоҳиста Келдиёрова. – 15 кишини доимий иш билан таъминлаганман. “Аёллар, Ёшлар ва Темир дафтарларга киритилган 6 нафар хотин-қиз ва ёшларни хўжалигимга ишга олганимдан сўнг, дафтарлардан чиқарилди.  Ҳар тонг даламга бориб, яшнаб турган гўза ниҳоллари ва бўлиқ бошоқларини жавзо эпкинида силкитиб кўз-кўз қилаётган ғаллазоримга қараб, эл юртга нафим тегаётганимдан фахрланаман. Президентимиз ташаббуси билан амалга оширилаётган “Инсон қадри учун” тамойили асосида халқимиз фаровонлигини янада ошириш, тадбиркорликни жадал ривожлантириш ишига муносиб ҳисса қўшиш мақсадида 10 минг бош товуқ боқишга мўлжалланган паррандачилик комплексимни  яқин кунларда ишга тушираман.  “Қизил чорва” МФЙ ҳудудидаги Тошлоқ, Эскианҳор, Аэродром, Қизил чорва каби ўнлаб қишлоқларда яшаётган элликка яқин хотин-қизлар ва ёшларни иш билан таъминлайман. Олинган фойда эвазига пахта териш машинаси ва замонавий трактор харид қилдик. Қишлоқда маиший хизмат уйларини қуриш ва ишга туширишга ҳомийлик қилаяпмиз.

Иккинчи ўрин Чироқчи маҳалласида яшовчи Нилуфар Мўминовага, учинчи ўрин  эса тикувчилик цехи ташкил этиб,  “Ўзбекистон” маҳалласи аҳолисига намунали хизмат кўрсатиш баробарида 6 нафар дугоналарининг бандлигини таъминлаб келаётган ҳунарманд аёл Дилшода Саидовага насиб этди. Кўрик-танловнинг ғолиб ва совриндорларига туман кенгашининг Дипломлари ҳамда эсдалик совғалари тақдим этилди. Қашқадарёда “Ишбилармон аёл” кўрик-танловининг туман, шаҳар босқичлари давом этмоқда.

Сайфулла ИКРОМОВ,

“ХХI asr” мухбири