Маълумки, O'zLiDeP “Аёллар қаноти” томонидан анъанавий ўтказиб келинаётган “Ишбилармон аёл” кўрик-танловининг туман, шаҳар босқичлари давом этмоқда.

Кўрик-танловнинг Кармана туман босқичида туманда фаолият юритаётган 20 нафарга яқин тадбиркор хотин-қизлар танлов Низомига кўра беллашди.

Ҳунарманд Жамилова Дилбар миллий бош кийимлар тикишга уста бўлса, Муродова Гулбаҳор эса ота-бобомиздан бизга мерос бўлган, ЮНЕСКОнинг маданий мерос объектлари рўйхатига киритилган қуроқчиликда ас. Яна бир иштирокчи тадбиркор Наврўзова Мадина серқирра тадбиркор бўлиб, тикувчилик, қурувчилик билан биргаликда давлат хусусий шерикчилиги асосида 75 ўринли боғча ҳам ташкил қилган фаолларимиздан.

Шунингдек, Конимех ва Навбаҳор туманларида “Ал-азиз ипаги” ипакчилик кластерини яратган раҳбар Ражабова Жумагул опанинг фаолияти билан яқиндан танишар эканмиз, тадбиркорнинг ипакчиликда кластер яратишдаги босиб ўтган машаққатли йўли кўрик-танловда иштирок этган бошқа тадбиркор хотин-қизларга намуна бўлди.

- Вилоятимизнинг Кармана, Конимех, Навбаҳор туманларида яшовчи 1700 та хонадон вакиллари бандлигини таъминлаганмиз, ипакчилик корхонамизда эса 178 нафар доимий ишловчи ишчиларимиз бор. Хитой, Италия, Ветнам, Эрон, Миср, Ҳиндистон каби давлатларга маҳсулотимизни экспорт қиламиз. Ўтган 2021 йил давомида 1 миллион 50 минг долларлик шартномани бажардик, жорий йилда эса 1 миллион 200 минг долларлик экспорт шартномамизни бажариш учун ҳаракатдамиз. Корхонамиз йилига 200 тонна қуруқ, 600 тонна ҳўл пилла ишлаб чиқариш қувватига эга. Шунингдек, келажакда Япониянинг “Мимаки” фирмаси дастгоҳларини импорт қилиб, пилла ҳосилдорлигини ва сифатини янада ошириш режамизда бор, - дейди ипакчилик кластери раҳбари Ж.Ражабова.

Ҳакамлар ҳайъати аъзоларининг хулосасига кўра “Ишбилармон аёл” кўрик-танловининг Кармана туман босқичида Ражабова Жумагул ғолиб деб эълон қилинди ҳамда танловнинг вилоят босқичига йўлланмани қўлга киритди.

Кўрик-танлов якунида иштирокчилар диплом ва эсдалик совғалари билан тақдирланди.

Ш.Шокирова

O'zLiDeP Навоий вилоят кенгаши

бўлим мудири