Шанхай ҳамкорлик ташкилотининг Самарқанд саммити унда бирлашган давлатлар учун анчайин фойдали бўлиши кутилмоқда. Сабабики, саммит доирасида 30 га яқин халқаро битимлар имзоланиши айтилмоқда. Албатта, мазкур йиғилишнинг ШҲТ га аъзо давлатлар қаторида хусусан, Ўзбекистон учун қандай муҳим сиёсий аҳамиятга эга эканлиги давлатимиз раҳбари Ш.Мирзиёев муаллифлигида чоп этилган  «Шанхай ҳамкорлик ташкилотининг Самарқанд саммити: ўзаро боғлиқликдаги дунёда мулоқот ва ҳамкорлик» номли мақолада ҳам аниқ ва равшан қилиб очиб берилган.   

Шундай катта йиғин ва унинг қандай кечиши борасидаги фикрлар, бугунги глобал замонанинг нотинчликларию халқлар ва давлатларнинг ўзаро бирлашуви натижасида юзага келадиган иқтисодий, ижтимоий ва бошқа маслаларда эришиладиган ижобий натижалар ҳақида айнан давлат раҳбарининг муносабат билдириши кўпчиликни бироз ҳушёрликка ундади. Мақолада ШҲТ мамлакатлар ўртасидаги турли келишмовчиликларни енгиб ўтиш, ўзаро англашувни мустаҳкамлаш, сиёсий ва иқтисодий ҳамкорликни ривожлантириш, савдо-сотиқни кенгайтириш ҳамда маданий-гуманитар алмашинувни рағбатлантиришга ёрдам бериши таъкидланар экан ушбу ташкилот айнан мана шундай мақсад ва вазифаларни кўзлаши айтилган Ваҳоланки, бу ташкилот маданий-цивилизацион қарашлари турлича, ўз ташқи сиёсий йўналишлари ва миллий тараққиёт моделларига эга мамлакатларни бирлаштира олган ўзига хос давлатлараро тузилма эканлиги, тарихан қисқа даврда ШҲТ катта йўлни босиб ўтиб, глобал сиёсий ва иқтисодий тизимнинг ажралмас қисмига айлангани ҳам қайд этилган.

Айниқса, бу галги йиғилишнинг “Ҳар биримиз кучли бўлсаккина ШҲТ кучли бўлади” шиор остида ўтказилаётгани Ташкилотни янада кучли ва халқаро ҳамкорларимиз учун янада жозибадор бўлишига эришиш учун жиддий ҳаракат қилинганини ифодалайди. Шу маънода Президент ШҲТнинг Самарқанд саммити умумий хавфсизлик ва тараққиёт йўлидаги ўзаро ҳурмат, ишонч, конструктив ҳамкорлик принципларига асосланган янги, инклюзив мулоқотни йўлга қўйиш борасида ўзига хос намуна бўла олишини таъкидлайди. Давлат раҳбарининг ишончи ва қатъиятига таянган ҳолда ушбу йиғилиш ана шундай кутилган натижалар билан якунланишига биз ҳам ишонамиз.

Алишер Рўзиев,

O'zLiDeP Сурхондарё вилояти Кенгаши депутати,

Партиянинг вилоят Кенгаши раиси