O`zLiDeP Сиёсий Кенгаши Ижроия қўмитаси ва Олий Мажлис Қонунчилик палатаси депутатларидан таркиб топган ишчи гуруҳ Вазирлар Маҳкамасининг “Сирдарё вилоятида соғлиқни сақлаш тизимини такомиллаштиришнинг янги модели – Гулистон тиббиёт кластерини ташкил этиш чора-тадбирлари тўғрисида”ги Қарорида белгиланган вазифалар ижросини ўрганди.

Қонунчилик палатаси депутатлари, партия вакиллари ва тиббиёт ходимлари иштирокида Гулистон тиббиёт кластерида ташкил қилинган тадбирда мазкур ўрганиш натижалари муҳокама қилинди.

Гулистон тиббиёт кластери директори Қ.Хотамов томонидан кластерни ташкил этиш жараёнлари, амалга оширилган фаолият, халқ саломатлигини сақлашдаги қулайликлари, кластерда амалга оширилган жарроҳлик амалиётлари ва уларнинг афзалликлари, сифат даражаси тўғрисида маълумотлар берилди.

“Олдинлари бир беморни комплекс текширувдан ўтказишимиз ва аниқ ташхис белгиланиши учун кўплаб тиббиёт соҳа вакилларидан ўтказишда ноқулайликларга дуч келардик ва бу беморларимизнинг сарсонгарчилигига ҳам сабаб бўларди. Ҳозирда кластерга келиб жойлашганимиздан сўнг бундай салбий ҳолатларнинг олди олинди ва тиббиёт вакилларининг ўзаро келишиб аниқ ташхис қўйилиш жараёни тезлашди, бунинг оқибатида беморлар ҳам шифокорлардан миннатдор бўлмоқда.”, - дейди сўзга чиққан эндокринолог Ж.Тожиева.

Тадбир сўнггида, иштирокчилар томонидан берилган саволларга тадбир ташкилотчилари томонидан батафсил жавоблар берилди. Шунингдек, тиббиёт ходимлари томонидан билдирилган таклифлар депутатлар назоратига олинди.

Нилуфар Отаева,

O'zLiDeP Сиёсий Кенгаши Ижроия қўмитаси

ишчи гуруҳ аъзоси