Ёшлар ҳар қандай давлатнинг эртанги куни ва эришажак натижаларини белгилаб берувчи куч ҳисобланади.

Шуни англаган ҳолда мамлакатимизда ёшларнинг таълим-тарбияси, уларнинг истеъдод ва имкониятларини тўғри йўналтириш масалаларига катта эътибор қаратиб келинмоқда.  

Ҳатто юртимизнинг энг чекка ҳудудларида истиқомат қилувчи ёшлар ҳам бу эътибордан четда қолишмаяпти.

Жумладан, Бўстонлиқ туманида таҳсил олаётган ёш авлод вакилларининг ҳуқуқий билимларини синовдан ўтказиш ҳамда уларнинг муаммолари билан танишиш мақсадида Олий Мажлис Қонунчилик палатаси депутати Расул Кушербаев иштирокида учрашув ташкил этилди.

O’zLiDeP Тошкент вилоят Кенгаши томонидан ташкил этилган ушбу давра суҳбати Бўстонлиқ тумани “Қораманас” МФЙда жойлашган 33-умумий ўрта таълим мактабида бўлиб ўтди.

Мактаб ўқувчиларининг ҳуқуқий саводхонлигини юксак баҳолаган депутат Расул Кушербаев таълим йўналишида марказда бошланаётган ислоҳотлар ярим йўлда қолиб кетмаётганини алоҳида эътироф этди. Энг чекка қишлоқларга ҳам етиб бораётганини қайд этди. Аммо, бу муаммолар тўлалигича бартараф этилганини билдирмаслигини, ҳудудда ҳам ўзига яраша ҳал этилиши лозим бўлган масалалар борлигини таъкидлади. Хусусан, бугунги кунда тўлиқ икки сменада фаолият кўрсатаётган мактабнинг қувватини ошириш борасида қўшимча бино қуриб бериш лозимлиги тўғрисида тўхталди. Ушбу масалани ижобий ҳал этишда тегишли вазирлик ҳамда идораларга таклиф киритишини айтиб, уларнинг ижобий кўз билан қарашларига умид билдирди.

Кўпроқ ёшлар билан очиқ мулоқот қилинган учрашувда ўқувчиларнинг конституцион билимларини синовдан ўтказиш билан бирга уларнинг хоҳиш-истаклари ҳам тингланди. Бугун қишлоқда улғайиб камол топаётган ёшларни қандай масалалар ўйлантираяпти, уларга келажакда ўз ўрнини топишида қанақа ёрдам керак, деган саволларга жавоб олишга ҳаракат қилинди. Қишлоқ шароити бўлишига қарамасдан, ёшларнинг замонавий IT технологияларидан фойдаланиш имкониятини ошириш, бу борада керакли инфратузилмани яхшилаш, яъни IT парклар қуриб бериш, ҳудудни замонавий оптик толали интернет билан таъминлаш масалалари бўйича мурожаат ва таклифлар олинди.

Депутат, партия вилоят ҳамда туман Кенгаши мутасаддилари Бўстонлиқдаги ёшлар спорти билан яқиндан танишиш мақсадида бу ердаги спорт мажмуасида ҳам бўлишди.

Мажмуада туман спортчи ёшлари томонидан қўлга киритилган ютуқлар билан танишган халқ вакиллари эришилган натижаларни ижобий баҳолашди.

Зухро Мирзоҳамдамова,

O’zLiDeP Тошкент вилоят Кенгаши

бўлим мудири