O’zLiDeP Ғузор туман Кенгаши “Аёллар қаноти” гуруҳи томонидан тумандаги “Саховат” корхонасида хотин-қизларда тадбиркорлик ва ишбилармонлик кўникмаларини шакллантириш, уларнинг бизнес фаолиятини тўғри ташкил этишга ўргатиш, оилавий тадбиркорлик, ҳунармандлик, касаначилик фаолиятига кенг жалб этиш, ҳуқуқий, иқтисодий ва сиёсий саводхонлигини оширишга қаратилган “Бугуннинг тадбиркор аёли” мавзуида тадбир ташкил этилди.

Яқин атрофдаги маҳаллаларда истиқомат қилаётган аҳоли иштирок этган тадбирда туман кенгаши раиси ўринбосари Юсуф Турдиев, туман кенгаши депутати Бобомурод Ашуровлар сўзга чиқиб, хотин-қизларнинг бизнесга доир иқтисодий билимларини  мустаҳкамлаш, тадбиркорликка кенг жалб этиш, маҳаллий ишлаб чиқаришни ривожлантириш асносида бандликни таъминлаш борасида амалга оширилаётган ислоҳотлар ҳақида сўзлашди. 

-2022–2026 йилларга мўлжалланган Янги Ўзбекистон тараққиёт стратегиясида хотин-қизларнинг бандлигини таъминлаш, уларни тадбиркорлик фаолиятига кенг жалб этиш масалалари устувор йўналиш сифатида белгиланган, - дейди O’zLiDeP Ғузор туман Кенгаши “Аёллар қаноти” гуруҳ раҳбари Адолат Чориева. - Сарвиноз Фармонова  “Батош” маҳалласида партиямиз кўмагида ўз тадбиркорлигини йўлга қўйганлардан. Икки йил муқаддам тикувчилик цехи очиб, 5 нафар хотин-қизларни иш билан таъминлаган эди. Айни пайтда унинг “Саховат” тикувчилик корхонасида “Аёллар дафтари”га киритилган 51 нафар хотин-қизларнинг бандлиги таъминланган. Йилига 50 минг донага яқин турли бичимдаги мавсумий кийим-кечаклар тайёрланади. Маҳсулотларни хорижга экспорт қилиш борасида амалий ишлар бошланган. Келгусида фаолиятини янада кенгайтириб, яна 30 нафар хотин-қизлар учун янги иш ўринлари яратмоқчи.

Тадбир сўнгида хотин-қизларнинг ижтимоий-сиёсий фаоллигини ошириш, бандлигини таъминлаш борасида партия “Аёллар қаноти” томонидан амалиётга татбиқ этилаётган лойиҳалар ҳақида батафсил маълумот берилди.   

                   O’zLiDeP Қашқадарё вилоят кенгаши

Матбуот хизмати.