Шу кунларда Ўзбекистон Республикаси Олий Мажлис Қонунчилик палатаси ҳузуридаги Ёшлар парламентига ўтказиладиган бўлажак сайловга тайёргарлик ишлари Тошкент шаҳрида фаол олиб борилмоқда. Жумладан, O’zLiDeP Тошкент шаҳар ва туман Кенгашлари томонидан сайловни ташкил этиш ҳамда ўтказиш мақсадида ташкилий қўмита ва ҳакамлар ҳайъати тузилиб, чора-тадбирлар ишлаб чиқилди.

Ҳозирги кунда тегишли округдаги туманларда саралаш босқичи бўлиб ўтмоқда. Масалан, Пойтахтимизнинг Юнусобод ва Мирзо Улуғбек туманларида ҳам танлов низомида кўзда тутилган вазифалар ижросига жиддий киришилди.

Партия масъуллари  ҳамда тегишли жамоат ташкилотлари фаолларидан иборат ҳакамлар ҳайъати аъзолари томонидан номзодларнинг ҳужжатлари белгиланган тартибда кўздан кечирилиб, уларга  тегишли тавсия ва маслаҳатлар берилмоқда.

Дарҳақиқат, ёшларнинг истеъдод ва қобилияти, эзгу интилишларини тўлиқ рўёбга чиқариш, ижтимоий-сиёсий фаоллигини ошириш, Ватанга содиқ, қатъий ҳаётий қарашларга эга йигит-қизларни тарбиялаш, ҳаётда муносиб ўрин эгаллашлари учун барча имкониятларни яратиб бериш давлатимиз ва жамиятимизни бош мақсади бўлиб қолаверади. Ёшларимизни келажагимиз ворислари деб бемалол айта оламиз.