Кейинги йилларда республикамизда амалга оширилаётган туб ислоҳотларнинг ҳаётга амалий татбиқ этилаётганини барчамиз кўриб турибмиз. “Инсон манфаатлари – ҳамма нарсадан устун”, “Халқ давлат идораларига эмас, давлат идоралари халқимизга хизмат қилиши керак”, “Давлат – инсон учун”, деган эзгу ғоялар Ўзбекистон тараққиётининг янги босқичида кўзда тутилган ислоҳотларни ҳаётга татбиқ этишнинг асосини ташкил қилмоқда.

Ҳеч шубҳасиз, тадбиркорлик, инвестиция иқтисодиётимизнинг ўсиши ва юртимизнинг  фаровон бўлишида таянч нуқтадир. Қиёслаб айтганда, тадбиркорлик фаолияти ҳар қандай жамият тараққиётини таъминловчи локомотив ҳисоб ланади.

Мамлакатимизда эркин бозор фаолият кўрсатиши учун яратилаётган шароит хорижлик ишбилармонларда ҳам катта қизиқиш уйғотмоқда. Шу сабабли ҳам ишончли шериклар танлаш, чет эллик инвесторлар ҳамкорлигида корхоналар очиш, маҳаллий ва хорижий инвестицияларни кенг жалб этиш учун зарур шароит ва қулай муҳит яратиш борасида ишларни фаоллаштириш зарур. Айниқса, жойларда кенг кўламли ишларни амалга ошириш мақсадга мувофиқдир. Бу O‘zLiDeP Тошкент шаҳар кенгаши ва унинг барча депутатларига улкан масъулият юклайди.

Пойтахтимизда ҳам бу каби истиқболли ишлар ижросини таъминлашда ҳамда жойлардагидек учраб турган айрим муаммоларни ҳал этишда партиямиз халқ депутатлари Тошкент шаҳар кенгаши депутатлари ва туман кенгашларига сайланган партия депутатлик гуруҳларига таянади. Халқ вакиллари қанчалик масъулиятли, фаол, ташаббускор ва жонкуяр бўлса, кўзланган мақсадларга шунчалик тез эришамиз.

Бугун қабул қилаётган тўғри қароримиз эртанги кун учун барқарорликни таъминлашга хизмат килади. Шундай экан, Тошкент шаҳридаги мавжуд вазиятни ижобий томонга ўзгартириш учун, аввало, депутатлар, фаоллар намуна бўлиши лозим.

Партиямиз ўз кучига ишонади ва бунёдкорлар, реал ишлар партияси сифатида буни ўз амалий ишлари билан исботлашга қодир. Унутмаслигимиз лозимки, юртимизнинг бугунги ва эртанги кунини ўйлаб яшаш, шуҳратини ошириш – барчамизнинг устувор вазифамиздир.

Равшан ФАЗИЛОВ,

O‘zLiDeP Тошкент шаҳар  кенгаши раиси, 

Халқ депутатлари  Тошкент шаҳар кенгаши депутати