Бу йил тўрткўлликлар энг улуғ, энг азиз байрам – мамлакатимиз мустақиллигининг 28 йиллик байрамини ўзгача кўтаринкилик, бунёдкорлик билан қарши олди. Сабаби мустақиллик байрами арафасида ҳудудда “MUSTAFA-FARM” МЧЖ иш бошлади.

Корхонанинг очилиш маросими муносабати билан ташкил этилган тадбирда O‘zLiDeP туман Кенгаши фаоллари, маҳаллий кенгаш депутатлари ҳамда тадбиркорлик фаолиятини бошламоқчи бўлган ёш йигит-қизлар иштирок этди.

 “Ушбу лойиҳа қиймати 1 800 000 АҚШ долларини ташкил қилади. Корхонамизда кунига 500 минг дона бир марталик тиббиёт учун қўлланиладиган шприцлар ишлаб чиқарилади. Шунинг ҳисобига 120 нафардан ортиқ ёшлар иш билан таъминланди”, – дейди корхона раҳбари М.Юсупов.

“Олдинда режаларимиз кўп. Келгусида ишлаб чиқариш ҳажмини кенгайтириб, тайёр маҳсулотларнинг 50 фоизини хорижга экспорт қилмоқчимиз. Шунда ёшлар учун янада қўшимча иш ўринлари яратилади”, – дея қўшимча қилди у.  

Тадбир давомида иштирокчилар корхона фаолияти, ишлаб чиқариш жараёнлари билан яқиндан танишди.

 O‘zLiDeP Қорақалпоғистон Республикаси

 Кенгаши матбуот хизмати