Ёшлик ғайрат-шижоатга тўлган пайт. Тоғни урса, талқон қилгудек кучи, ақли, дунёни ўзгартиришга қодир янги ғоялар билан тўлиб-тошган ўғил-қизлар бугун O‘zLiDeP сафида ҳам фаол. Уларнинг бу шижоатига, ташаббусларига партиянинг “Ёшлар қаноти” неча йиллардан бери маслакдош, кўмакдош бўлиб келмоқда. Бу йил ҳам у кўплаб ёшларнинг ташаббусларини рўёбга чиқарди. Улар қандай лойиҳалар эканлиги эса партиянинг Сурхондарё вилоят Кенгашида ўтказилган тузилманинг ҳисобот сайлов конференциясида очиқ ойдин муҳокама қилинди.

— Айтиш керакки, “Ёшлар қаноти” O’zLiDeP Сурхондарё вилоят Кенгаши қошида 2004 йил январь ойида ташкил этилган бўлиб, ҳозирда партия аъзоларининг 55 фоизини ёшлар ташкил этади, — дейди O‘zLiDeP Сурхондарё вилоят Кенгаши бўлим бошлиғи Матлуба Жўраева. — У ўз атрофида замон руҳини теран  илғайдиган, ишбилармон, тадбиркор малакали ёш мутахассисларни жипслаштирди ва ёшларни жамиятда муносиб ўрнини эгаллашлари учун  шарт-шароитлар  яратишга қаратилган  ташаббусларни амалга оширди. Ўтган 5 йил давомида тузилма томонидан “Диплом билан бизнесга”, “Ишбилармон талаба” ва “Ёш инновациячи” стипендиялари, “Ёш мулкдор-юрт таянчи”, “Парламентда менинг ўрним”, “Агар мен депутат бўлсам” каби кўрик–танловлар ҳамда “O‘zLiDeP кутубхонаси”, “Ёш тадбиркорларнининг муаммоларини ўрганиш” гуруҳлари, уюшмаган  ёшлар  бандлигини таъминлаш бўйича лойиҳалар амалга оширилди. Кенгашнинг депутатлик гуруҳи аъзолари ташаббуси билан 33 нафар ёшга тижорат бенкларидан жами 2 млрд. сўмдан ортиқ имтиёзли кредитлар олиб берилишида амалий ёрдам кўрсатилди. 200га яқин ёш  иш билан таъминланди.

Мисол учун, Жарқўрғон туманидаги ёш фермер Алпомиш Норалиев ҳамда бойсунлик ёш ҳунарманд Назокат Собировага тадбиркорлигини йўлга қўйиш учун 50 млн. сўм кредит ажратилишида амалий ёрдам берилди. Ангор тумани “Зартепа” маҳалласида яшовчи Маржона Нурхонова ҳам “Ёшлар қаноти” кўмагида олиб берилган 30 миллион сўм кредит эвазига иссиқхона ташкил этди.

Бундан ташқари, ҳар йили 50 минг нафардан ортиқ уюшмаган ёш ҳамда коллеж битирувчилари қамраб олиниб, “O’zLiDeP ёшларнинг илғор, инновацион ғоя ва лойиҳаларини ҳаётга татбиқ этишга ҳар томонлама кўмаклашади” ҳамда “Ёшларни тадбиркорлик соҳасига кенг жалб қилиш уларни бандлигини таъминлашда муҳим омилдир” мавзуларида давра суҳбатлари ўтказилди.

Вилоят Кенгашининг ёшлар билан ишлаш бўлими томонидан эса “Сен ҳам фаол ёшлар сафидасан!”, “Парламентда менинг ўрним”, “Хавфсиз интернет” каби лойиҳалар доирасида тарғибот-ташвиқот тадбирлари мунтазам равишда ўтказиб келинди.

“Ишбилармон талаба” ва “Ёш инновациячи” стипендияси кўрик-танлови доирасида 7092 нафар ёш тадбирларда иштирок этиб, 30 га яқин талабага бир йил давомида стипендиялар ҳам ажратилганини алоҳида эътироф этиш жоиз

“Ёш фермер” кўрик-танловида қатнашган воҳалик ёшларимиздан 6 нафари республика босқичидан фахрли ўринлар билан қайтишди. 200 га яқин ёш  иш билан ҳам таъминланди.

“O‘zLiDeP кутубхонаси” лойиҳаси доирасида Термиз шаҳри, Қизириқ, Олтинсой туманларида 3 та кутубхона ташкил этилиб, уларда 1500 га яқин бадиий китоблар мавжуд.

Конференцияда сўзга чиққанлар ана шулар хусусида тўхталар экан, гуруҳнинг келгуси режалари ва “Йўл харитаси”ни ҳам муҳокама қилишди. Бира тўла “Ёшлар қаноти” гуруҳи ва Жамоатчилик Кенгаши таркиби ҳам тасдиқланди.

Шунингдек, конференция доирасида ўтказилган юриш ва югуриш марафонида ғолибликни қўлга киритган ёшлар диплом ва эсдалик совғалари билан тақдирландилар.

O‘zLiDeP Сурхондарё вилоят Кенгаши

 матбуот хизмати