Мамлакатимизда ёшлар бандлигини таъминлаш, уларнинг бўш вақтларини мазмунли ташкил этишга қаратилган ишлар кўлами кенгайган. Бироқ амалга оширилаётган ислоҳотларга қарамай, йўналашдаги камчиликлардан кўз юмиб бўлмайди. Шу боис ҳам муҳтарам Президентимиз раислигидаги жорий йилнинг навбатдаги видеоселектор йиғилишида ёшлар масалаларига батафсил тўхталиб ўтилди.

Бугун эртамиз эгаларига қай даражада кўп ва хўп эътибор беролсак, келажакни шу даражада ёрқин ва мустаҳкам барпо эта оламиз. Албатта, биринчи галда уларнинг бандлигини таъминлашимиз керак. Бунинг учун уларни талаб этилаётган касблар бўйича мутахассисликларини кўпайтириш ва меҳнат бозорида эҳтиёж юқори ҳунарларга ўргатиш, тадбиркорлик кўникмаларини шакллантириш зарур.

Бу йўналишдаги ишларни янада ривожлантириш юзасидан давлатимиз раҳбари ўз фикр-мулоҳазаларини, таклифларини ўртага ташлар экан, бизнинг ҳам олдимизга долзарб вазифалар ижросини қўйдилар. Хусусан, O’zLiDeP Андижон вилоят Кенгаши ҳам мазкур мавзу юзасидан тегишли вазифаларни белгилаб олди. Ёшлар қаноти атрофига бирлашган 20 мингдан зиёд йигит-қизларимизнинг ташаббусларига ҳавас қилса арзийди. Уларнинг зеҳни, илғор фикрлари билан янги-янги лойиҳаларимиз кўз очяпти.

Президентимизнинг 2020 йил 13 октябрдаги “Аҳолини тадбиркорликка жалб қилиш тизимини такомиллаштириш ва тадбиркорликни ривожлантиришга доир қўшимча чора-тадбирлар тўғрисида”ги қарорига мувофиқ жорий йил бошида Ёшлар қанотининг илғор ташаббуслари қанот ёзди. Хусусан, туман, шаҳар кенгашларимиз қошида ишсиз йигит-қизларнинг қизиқишларидан келиб чиқиб, уларни тадбиркорликка ўқитиш ва фаолиятини бошлашлари учун дастлабки қадам қўйишларида кўмаклашиш марказлари фаолиятини йўлга қўйиш ишларини бошлаяпмиз. Бу билан тадбиркор, ишбилармон, фермер ёшларимиз сафи кенгаяди.

Бундан ташқари, инновацион технологияларга қизиқувчи ёшлар ўртасида “Ташаббус қанотлари” ярмаркаларини ташкил этишни иш режамизга киритганмиз. Бунда ахборот, компьютер соҳаларида инновациялар, янгиликлар яратаётган андижонлик ёшларимизнинг бир-бирлари билан тажриба алмашишлари, ўрганишлари учун замин яратилади. Инновацион маҳсулоти энг юқори кўрсаткич билан баҳоланган ярмарка иштирокчиларининг уч нафарига O’zLiDeP дипломи ва эсдалик совғалари топширилиши кўзда тутилган.

Бу каби эзгу саъй-ҳаракатларимиз барчаси ёшларимизнинг қизиқишлари, иқтидорлари манфаатларига йўналтирилган бўлса, яна бир томондан ишсиз йигит-қизларимизни излаб топиб, уларга бандлик масалаларида кўмаклашишдан иборат.

Хуршидахон ХАЛИЛОВА,

O’zLiDeP Андижон вилоят Кенгаши раиси,

халқ депутатлари вилоят кенгаши депутати.