Учқудуқ Навоий вилоятининг энг олис туманларидан бири ҳисобланади. Вилоят марказидан 350 км узоқликда жойлашган бу туман аҳолисининг тўлиқ тиббий кўрикдан ўтиши бир муаммо, Эркаклар-ку қунт қилиб, Навоий шаҳрига келиб кетишар, аммо уй-рўзғор ташвишларидан ортмайдиган аёллар ҳатто саломатлигига дахлдор бўлса-да, вақтларини қизғанишади.

Ана шуларни ҳисобга олган O'zLiDeP Учқудуқ туман бўлими Аёллар қаноти туман тиббиёт бирлашмаси билан ҳамкорликда учқудуқлик ижтимоий ҳимояга муҳтож аёллар учун алоҳида бепул тиббий кўрик уюштирди.

“Соғлом оила-мустаҳкам оила” лойиҳаси доирасида давомли тарзда ўтказилиб келаётган тиббий кўриклардан кўзланган  мақсадга асосан, ушбу тиббий кўрикда “Мустақиллик” МФЙ даги  барча хотин-қизларини қамраб олишга ҳаракат қилинди.

Кўрикка чақирилган аёллар замонавий тиббиёт анжомлари назоратидан ўтишиб, ўзларини безовта қилаётган хасталикларни даъволатиш бўйича малакали  шифокорлардан маслаҳатлар олишди.

- Оилада аёл ҳам жисмонан, ҳам руҳан соғлом бўлса, жамиятимиз учун комил инсонни тарбиялаб беради. Шунинг учун уларни ўзларининг соғлигига аҳамият беришга ўргатишимиз керак. Бундан ташқари аёл жамиятга керак эканлигини, ҳар дақиқада ҳис қилиши зарур, - дейди ЎзЛиДеП Учқудуқ туман бўлими аппарат раҳбари Н.Рўзиева.

O'zLiDeP Навоий вилояти кенгаши

матбуот хизмати