Айрим хорижий ахборот агентликларининг маълум қилишича, ўтган йилдан эътиборан мамлакатимиз хорижга газ экспортини тўхтатган. Аксинча, 2020 йилдан бошлаб мазкур хом ашёни Туркманистондан “Газпром” компанияси орқали импорт қилмоқда. Жумладан, шу йилнинг биринчи чорагида  Ўзбекистон 1,5 млрд куб газ харид қилган.

Айримлар сингари бу ҳолатга салбий муносабат билдириш, газ қазиб чиқариш, тақсимлаш билан шуғулланувчи ташкилотларни танқид қилиш  билангина чекланиб қолмоқчи эмасмиз. Масалага бир ёқлама, юзаки ёндашиш ярамайди. Бинобарин, мазкур жараёнга ҳар томонлама, холис назар ташлаган ҳолда мушоҳада юритишга ҳаракат қиламиз.

Аввало шуни айтиш керакки, давлатимиз, ҳукуматимиз барча истеъмолчиларнинг ёнилғи билан узлуксиз таъминланишига жиддий эътибор қаратаётгани таҳсинга лойиқ. Мабодо, масъуллар “газ йўқ, тамом-вассалом” деб эълон қилганида, катта-ю кичик истеъмолчилар додини кимга айтарди?! Бу – биринчидан. 

Иккинчидан, газни хорижга сотмаётганимиз мамлакатимиз иқтисодиёти жадал ривожланаётганини, ўз эҳтиёжларимиздан ортмаётганини, шунингдек, бу борада бошқа режаларимиз борлигини ҳам англатади.  Ўтган йили Бош вазир Абдулла Арипов газ экспорти тўхтатилишини, эндиликда ушбу табиий бойлик ўзимизда тўла қайта ишланиб, қимматли маҳсулотлар ишлаб чиқарилишини маълум қилганини қайд этиш керак. Шу ўринда республикамизда етиштирилаётган пахта экспорти йилдан-йилга камаяётганини,  “оқ олтин”нинг катта қисми ўзимизда қайта ишланиб, турли-туман маҳсулотлар тайёрланаётганини ёдга олиш жоиз. Зеро, четга хом ашёдан кўра, тайёр маҳсулот сотиш анча фойдалироқдир.

 Шу билан бирга “зангори олов”нинг катта ҳажмларда импорт қилиниши газ қазиб олиш соҳасидаги  муаммоларни атрофлича ўрганиб чиқиш ва зудлик билан ҳал қилиш зарурлигини кўрсатмоқда.  Тизимни модернизациялаш, илғор технологияларни жорий қилиш, соҳада малакали мутахассисларни кўпайтириш шулар жумласидандир.

Бундан ташқари, газ – битмас-туганмас бойлик эмас. Мутахассислар юртимиздаги “зангори олов” захиралари 20-30 йилдан сўнг тугашини билдиришмоқда. Шу боис муқобил энергия манбаларини ишга солишга кўпроқ эътибор қаратишимиз, бу йўналишдаги жараёнларни жадаллаштиришимиз тақозо этиляпти.

Ҳукуматимиз табиий газ қайта ишланиб, маҳсулотлар ишлаб чиқариш бўйича бир қанча лойиҳаларни амалга оширишни режалаштирмоқда. Уларнинг молиялаштирилиши, амалга татбиқ қилиниши  шаффоф, очиқ-ойдин кечиши мақсадга мувофиқдир. Чунки коррупция барча саъй-ҳаракатларни йўққа чиқариши мумкин.  Шу сабабли бу йўналишда депутатлик ва жамоатчилик назорати имкониятларидан самарали фойдаланиш даркор. 

  Тўлқинжон Файзиев,

Халқ депутатлари Тошкент вилояти

 Кенгаши депутати, O’zLiDeP

Тошкен вилоят Кенгаши раиси