O’zLiDeP Тойлоқ туман Кенгаши томонидан тумандаги "Амиржон-Анваржон боғлари" фермер хўжалигида “Қишлоқ хўжалигида учраётган сув исрофгарчилигини олдини олиш ва сув тежовчи технологияларни жорий этиш ҳолатини яхшилашга қаратилган ишларни амалга ошириш” мавзусида амалий учрашув ташкил этилди.

Учрашувда қишлоқ хўжалигида сув исрофгарчилигининг олдини олиш ва соҳага сув тежовчи интенсив технологияларни жорий этиш борасида юртимизда олиб борилаётган кенг кўламли ислоҳотлар хусусида фикрлар алмашилиб, ушбу фермер хўжалигида жорий қилинган томчилатиб суғориш технологияси ва унинг афзалликлари билан яқиндан танишилди.

Фермер хўжалиги раиси Жаҳонгир Суюновнинг таъкидлашича 2015 йил ташкил этилган ушбу фермер хўжалиги боғдорчилик ва узумчиликка ихтисослашган бўлиб, жами ер майдони 22 гектар, шундан 16 гектар интенсив боғ, 6 гектар токзорлардир. Туман ҳокимининг 2019 йил декабр ойидаги қарорига асосида озиқ-овқат хавфсизлигини таъминлаш дастури доирасида 16 гектар ер майдони томчилатиб суғоришга асосланган сув тежовчи интенсив боғга айлантирилган.

Айни пайтда 3 хил навли 38400 туп олма кўчатлари, жумладан 5,5 гектар қизил Пенкли нави, 5,5 гектар Голден нави, 5 гектар Гала сариқ олма кўчатлари Туркия давлатидан келтирилиб, экиб парвариш қилинмоқда. Бир вақтнинг ўзида олма боғи дарахтлари оралиғига 12 гектар майдонга карам, 4 гектар майдонга эса сабзи экилган. Ўтган йили шу усулда экилган ловия ва картошкадан 70-80 млн.сўм даромад олинган.

Энг асосийси интенсив технологияларни қўллаш натижасида қишлоқ хўжалк экинлари ҳосилининг миқдори ва сифати ҳам сезиларли равишда ошган.