“Аёллар дафтари”га киритилган Саодат Саъдуллаева тадбиркорга айланди

28.07.2021, 17:04

“Аёллар дафтари”га киритилган Саодат Саъдуллаева тадбиркорга айланди

Бухоронинг “Аёллар дафтари”га киритилган Саодат Саъдуллаева бугун фаол тадбиркор аёлларидан бирига айланган. У “Саодатхон” МЧЖ кичик корхонасини ташкил этганига кўп вақт бўлгани йўқ.

Ушбу ишлаб чиқариш субъектини ташкил этишда эса “Халқ банки” нинг вилоят филиалидан ажратилган 30 миллион сўмлик кредит асқотди. Ушбу маблағ ҳисобидан сотиб олинган 2 та янги конструкцияли контейнерда бугунги кунда жами 6 та иш ўрни яратилган. Замонавий шохобчанинг бирида тикувчилик цехи ташкил этилган бўлиб, иккинчисида “Гўзаллик салони” ўз фаолиятини бошлаб юборган.

– Анчадан бери уйда ишсиз ўтириб қолган эдим, – дейди тикувчиликда озми-кўпми тажрибага эга бўлган маҳаллий аёллардан бири Саломат Саъдуллаева. – Рўзғоримизга қут-барака кирадиган бўлди.

Тикув цехида ҳам, “Гўзаллик салони”да ҳам устоз-шогирд анъанаси асосида ишлар олиб борилмоқда. Маълум бўлишича чевар тикувчилар томонидан ҳар куни 10 дан зиёд чойшаб, ёстиқ жилдлари буюртмачиларга етказиб берилмоқда. Бу ерда бир-биридан бежирим ва дид билан тикилган аёллар кўйлаклари учун ҳам буюртмалар қабул қилинмоқда.

Бугунги кунда “Аёллар дафтари”дан чиқарилган Инобат Расулова, Зарина Ҳамроева ва бошқа бир қатор хотин-қизлар ҳам ўз келажакларини самарали ва ҳалол меҳнатда, жамиятимиз равнақи йўлида хизмат қилишда деб билишмоқда. Уларнинг ҳаётда ўз ўрнини топиб олишлари учун юртимизда барча шароитлар мавжуд.

Бухоро шаҳридаги “Саодатхон” МЧЖда Тадбиркорлар ва ишбилармонлар ҳаракати – Ўзбекистон Либерал-Демократик партияси вилоят Кенгаши аъзолари, Аёллар қаноти ва партия вилоят Кенгаши Сиёсий таълим маркази, бошланғич партия ташкилотлари билан ишлаш ходимлари иштирокида ўтказилган давра суҳбатида ана шулар хусусида сўз юритилди.

Партия вилоят Кенгаши раисининг биринчи ўринбосари – аппарат раҳбари Бобомурод Очилов томонидан ўз фаолиятини партия сафида туриб давом эттириш истагида бўлган бир гуруҳ аёлларга аъзолик гувоҳномалари топширилди.

Зариф Комилов,

O'zLiDeP Бухоро вилоят Кенгаши 

бўлим мудири

  • Кўрилди
    387
  • Чоп этиш
  • Дўстлар билан улашиш
← Орқага қайтиш

Фикрингизни қолдиринг

Расмдаги мисолнинг жавобини киритинг, агар расмдаги сонлар кўринмаса "Ctrl+F5" тугмасини босинг.

+