Айниқса, тадбиркорлар яхши хабардор, шу йил 20 август куни давлатимиз раҳбари хусусий бизнес вакиллари билан очиқ мулоқот ўтказди. Учрашувда Президент, жумладан, умумий овқатланиш корхоналарига солиқ бўйича енгилликлар берилишини эълон қилди. Бир неча кун ўтгач, аниқроғи – кеча Президентимизнинг “Умумий овқатланиш ва туризм соҳаларини қўллаб-қувватлашнинг қўшимча чора-тадбирлари тўғрисида”ги қарори қабул қилинди. Мазкур ҳужжатда шундай жумлалар бор: “...2021 йил 1 сентябрдан бошлаб:        2021 йил 31 декабрга қадар умумий овқатланиш корхоналари юридик шахслардан олинадиган ер солиғи ва юридик шахсларнинг мол-мулкига солинадиган солиқни тўлашдан озод қилинади; 2023 йил 1 сентябрга қадар туристик (меҳмонхона) йиғимини ҳисоблаш ва тўлаш тўхтатилади”.

Кўплаб тадбиркорлар мулоқотда тилга олинган енгилликнинг амалга ошишини, амалга ошганда ҳам унинг бунчалик тез жорий этилишини кутмаган бўлсалар керак.  Бироқ, Янги Ўзбекистон бу! Сўз ва амал бирлигининг яна бир ёрқин намунаси бу!

Карантин чекловлари кучайтирилган пайтда маълум сабабларга кўра, ресторан, кафе, чойхона, шунингдек, меҳмонхона, отель каби тадбиркорлик субъектларига жуда қийин бўлди. Албатта, ҳамма ишбилармонларга ҳам осон бўлмади. Лекин, масалан, хўжалик моллари билан савдо қилувчилар харидорларни дўконга киритмай, эшик ё дарча орқали фаолиятини давом эттираверди. Ошхоналарда эса бундай имконият йўқ эди. Егуликни олиб кетиш эса деярли оммалашмади. Официант, фаррош, ошпаз  сингари ўн минглаб ишчи-хизматчилар ишсиз қолди. Хорижий ва маҳаллий сайёҳлар оқими деярли тўхтагани боисидан меҳмонхоналар ҳам зарарга кирди. Мазкур субъектларнинг фаолияти бугунга келиб ҳам тўла изга тушиб кетгани йўқ. Бинобарин, бундай эътибор, ғамхўрлик соҳа вакиллари учун айни муддао бўлди. Асосий электоратимиз бўлган тадбиркорлар росмана қўллаб-қувватланаётганидан биз – партия вакиллари ҳам ниҳоятда мамнунмиз.

Тўғри, режалаштирилган қанчадир маблағ эндиликда бюджетга тушмайди. Шунга қарамай,  давлатимиз раҳбари ана шу дадил ва қатъий қадамни қўйди. Бу эса хусусий секторни қўллаб-қувватлаш Янги Ўзбекистонда давлат сиёсатининг устувор  йўналишларидан бирига айланганидан далолат беради.

Давлатимиз соҳанинг келажаги учун ҳам қайғурмоқда. Мисол учун, “гастрономик туризм” деган йўналиш бор. Бу қарор ана шу тармоқнинг ҳам жадал ривожланишига хизмат қилади.

Президентимиз чиқишларидан бирида  “Ягона йўлимиз – тадбиркорлар сонини кўпайтириш, одамларни ишбилармон қилиш” дея таъкидлаган эди. Бугун ана шу ғоя, даъват ҳаётга татбиқ қилинаётганининг гувоҳи бўлиб турибмиз.          

Акбар Музаффаров,

O'zLiDeP Сиёсий Кенгаши

Ижроия қўмитаси бўлим мудири