Xalq deputatlari Karmana tuman Kengashi deputati H.Aktamov yangi yildagi ilk faoliyatini saylovoldi va’dasini bajarishdan boshladi.

Tuman hududida joylashgan “Ayronchi” mahallasida istiqomat qilib kelayotgan ijtimoiy himoyaga muhtoj oilalar holidan xabar olar ekan,  “Temirshayx” va “Firdavs”, “Yoshlik” ko‘chalarining nosozligi, bu ko‘chalardan o‘tib, maktabga qatnovchi bolalarning loy bosib o‘quv muassasasiga borayotganiga o‘zi ham guvoh bo‘ldi.

“Inson qadri uchun” shiorini xalq ishonchiday ulug‘ mas’uliyat bilan balandga ko‘tarishni maqsad qilgan deputat tezlik bilan qaror qabul qilib, shaxsiy mablag‘idan o‘zi saylangan mahalla ko‘chalarini ta’mirlashga kirishdi. 40 mashina tuprog‘u tosh keltirtirib to‘ktirdi.

Maxsus trasnportlar jalb qilinib, yo‘llarni tekislash, shag‘al to‘kish ishlari boshlab yuborildi. 700 metrlik “Firdavs” ko‘chasi, 1 kilometrlik “Temirshayx” ko‘chalarida tosh tashuvchi mashinalar kechayu-kunduz ishladi. 

Amalga oshirilayotgan xolis xizmat mahalladagi yoshu qarining qalbida fidoyilik tuyg‘usini jonlantirdi. Mahalla ahli, faollari va mutasaddilari ham bir chekkada qarab turmay, tosh yotqizish ishlariga qarashishga tushishdi.

Deputat yaxshi ishlarning boshida tursa, el koriga yarasa  xalqning olqishiga sazovor bo‘ladi. Buning haqiqatini esa “Ayronchi”da yashovchilarning shu kunlardagi gurunglaridan bilsa bo‘ladi.

O’zLiDeP Navoiy viloyati Kengashi

matbuot xizmati